Koorporata Energjetike e Kosovës (KEK), ditë më parë, ka publikuar një thirrje për tender për funksionalizimin e mensës dhe furnizimin me ushqim për punëtorët e saj. Por procedura e prokurimit është pezulluar të martën, për shkak të një ankese.
Kështu është bërë e ditur përmes një njoftimi nga E-Prokurimi, ku theksohet se pas pezullimit, të gjithë tenderët e dërguar më parë janë fshirë dhe duhet dërguar përsëri, përcjell teve1.info
“Autoriteti Kontraktues Korporata Energjetike e Kosovës sh.a. ju informon që një ankesë është dërguar në procedurën e prokurimit Furnizimi, Përgatitja, Funksionalizimi i mensave dhe shërbime që kanë të bëjnë me ushqimin e punëtorëve e KEK sh.a. Procedura e prokurimit është pezulluar. Të gjithë tenderët e dërguar para pezullimit të aktivitetit janë fshirë nga sistemi. Tenderuesit të cilët kanë ngarkuar dokumente ose dërguar tenderët në mënyrë elektronike, duhet që përsëri të dërgojnë tenderët duke krijuar një tender të ri nga fillimi”, thuhet në njoftim.
Njoftimi për kontratën “Furnizimi, përgatitja, funksionalizimi i mensave dhe shërbimet që kanë të bëjnë me ushqimin e punëtorëve e KEK sh.a”, është publikuar më 21 gusht dhe pastaj ripublikuar më 23 gusht, sipas njoftimit, “për korrigjimin e gabimeve në njoftimet e publikuara”.
Vlera e parashikuar e këtij tenderi është 10 milionë e 883 mijë e 950 euro, teksa lloji i procedurës është konkurruese me negociata.
Aktualisht, shujta e punëtorëve në KEK është në vlerën prej pesë eurosh, shumë kjo e cila bartet në kontot personale të tyre.
Deri në muajin prill, një shujtë e punëtorëve në këtë korporatë ka qenë 1.74 euro. Pas protestave të tyre për të shprehur pakënaqësi rreth kësaj çështjeje, dhe duke kërkuar rritje të pagave, nga muaji maj, shuma e shujtës ishte rritur në 5 euro.
KEK-u numëron përafërsisht rreth 3 mijë e 200 punëtorë. /Teve1.info/
