Përmes një njoftimi për media nga MD-ja kanë bërë të ditur se procedura disiplinore ndaj Topallit është iniciuar për pretendimet e shkeljeve të rënda procedurale që janë të ndërlidhura me rastin e ngjarjes së Astrit Dehari, i cili kishte vdekur në Qendrën e Paraburgimit në Prizren, më 5 nëntor 2016.
“Me këtë rast, pas konstatimit të gjetjeve të Raportit të cilat i kemi proceduar edhe në Prokurori të Shtetit, bëjmë thirrje dhe theksojmë nevojën e vazhdimit të procedurave hetimore për trajtimin e mëtutjeshëm të të gjitha rrethanave deri në zbardhjen përfundimtare të këtij rasti”, thuhet në njoftimin e kësaj ministrie.
Më 5 nëntor të vitit 2016, Astrit Dehari ka vdekur brenda Qendrës së Paraburgimit në Prizren. Ai dyshohet se ka qenë një nga gjashtë personat që mori pjesë në sulmin e gushtit të po atij viti me granatahedhëse në Kuvendin e Kosovës. /teve1.info/
