Analisti politik, Selam Shkodra, ka thënë se pezullimi i përkohshëm i dialogut strategjik Kosovë–ShBA nuk duhet interpretuar si prishje e marrëdhënieve me Shtetet e Bashkuara.
Shkodra i ka cilësuar si propagandë deklaratat që janë interpretuar si pezullim i raporteve mes Kosovës e ShBA-së.
“Nuk janë lajme të mira, por nuk është ashtu siç është tentuar të propagandohet se janë prishur marrëdhëniet me Amerikën. Është një program, i cili është suspenduar e që nuk e dimë deri në cilën periudhë kohore. Ndoshta nesër mund të rikthehet. S’ka ndërprerje të marrëdhënieve”, ka deklaruar ai në emisionin “Këndi i Debatit” në Tëvë1.
Analisti shtoi se marrëveshja për dialogun strategjik është relativisht e re dhe nuk përfaqëson tërësinë e raporteve Kosovë–SHBA.
“Të gjitha fenomenet, të gjitha proceset janë një eufori e përgjithshme për shumë procese që kalon vendi dhe shoqëria jonë. Është eufori, për shkak të mos analizimit të mjaftueshëm të informacioneve ose ngjarjeve që ndodhin. Pezullimi i dialogut këtu u interpretua thua që ndodhi kiameti, u shemb bota, u shembet ShBA-të, u shemb gjithësia – ndodhi gjithçka. ShBA-të këtë marrëveshje nuk e kanë pasur të nënshkruar deri para dy viteve. Ky është një lloj programi në mesin e shumë programeve. Jam kundër propagandës që po zhvillohet, është propagandë e kulluar sepse u tentua me u shitë në opinion se u prishen raportet me Amerikën”, theksoi Shkodra. /teve1.info/
