Senati i Universitetit “Haxhi Zeka” ka zgjedhur me unanimitet Prof. Asoc. Dr. Petrit Nimanin në pozitën e dekanit të Fakultetit Juridik për një mandat katërvjeçar.
Në njoftim është bërë e ditur se zgjedhja e Prof. Nimani vjen pas një procesi të rregullt dhe transparent zgjedhor, duke shënuar një fazë të re drejt fuqizimit të cilësisë akademike dhe shkencore në Fakultetin Juridik.
“Prof. Nimani është një prej emrave më të njohur në fushën e arsimit të lartë dhe hulumtimit shkencor në Kosovë, me kontribute të konsiderueshme në zhvillimin e shkencës juridike. Ai ka një karrierë të pasur akademike, duke publikuar libra, monografi dhe artikuj në revista prestigjioze ndërkombëtare, ku ka arritur të sjellë vlera të veçanta në literaturën juridike”.
Për punën dhe kontributin e tij, Prof. Nimani është shpallur disa herë si hulumtuesi më i mirë i vitit dhe konsiderohet një nga studiuesit më të vlerësuar në fushën juridike në Kosovë.
Në fjalën e tij pas zgjedhjes, Prof. Nimani premtoi përkushtim maksimal për avancimin e arsimimit juridik dhe përmirësimin e cilësisë shkencore në fakultet, duke synuar një arsim bashkëkohor dhe të avancuar që i përgjigjet sfidave të sotme./teve1.info/
