Kandidati i PDK-së për kryetar të Drenasit në zgjedhjet e fundit lokale, Petrit Hajdari, ka reaguar pas deklaratave dhe paraqitjes televizive të Ramiz Lladrovcit, duke thënë se ky i fundit po manipulon opinionin publik lidhur me “kthimin” në zyrat e PDK-së.
“Nuk është ‘kthyer’ z. Lladrovci në zyrat e PDK-së, sepse ato zyre nuk janë të PDK-së. Ai lokal është pronë private e familjarit të tij. Atë ambient ai mund ta përdorë për subjektin e vet politik dhe, nëse do, mund ta inkorporojë edhe Vetëvendosjen që i ndihmoi në zgjedhje, por ato zyre veç të PDK-së nuk janë”, tha Hajdari.
Ai theksoi se PDK në Drenas aktualisht është në opozitë dhe se rezultati zgjedhor është pranuar me korrektësi.
“Kemi qenë në proces zgjedhor që nuk e kemi fituar dhe gjithmonë e respektojmë verdiktin e qytetarit. PDK sot në Drenas është në opozitë. Kaq e thjeshtë është. Tjerat janë manipulim i pastër.”
Hajdari tha se e ka uruar kundërkandidatin e tij për fitoren dhe e ftoi të nisë punën si kryetar komune, në vend që të bëjë “skena politike”.
“E kam uruar për fitoren dhe i kam thënë: shko në zyrën e kryetarit dhe fillo punën. Këto skena s’i kanë hije askujt, aq më pak demokracisë dhe Drenasit”.
Ai gjithashtu kritikoi Lladrovcin për mënyrën se si u është përgjigjur gazetarëve gjatë intervistës, duke e krahasuar me kryeministrin Albin Kurti:
“Qytetarët e panë dje që kanë votuar për dikë që, kur i bëhen pyetje që s’i pëlqejnë, në stilin e Kurtit, u kthehet gazetarëve me linçim: ‘i pitë’, ‘i paguar’ – terma që s’i bëjnë nder askujt”.
Në fund, Hajdari theksoi se mbetet i përkushtuar ndaj qytetarëve të Drenasit, pavarësisht rezultatit zgjedhor.
“Kontributi im për Drenasin do të vazhdojë në çdo rrethanë. Nuk kam asnjë hatërmbetje me qytetarët e mi, sepse unë këtë vend e dua pa kushte – jo vetëm nga pushteti”.
Sipas tij, Ramiz Lladrovci “po kërkon me çdo kusht përplasje e viktimizim”, ndërsa PDK, siç tha, ka qenë e sinqertë me qytetarët që nga fillimi.
“PDK ka qenë e qartë – ai nuk është PDK. Zgjedhjet kanë qenë për kryetar komune, jo për kryetar dege apo mbret. Ta kemi uruar të gjithë, tash nisja punës e mos bëj skena, z. viktimë”, përfundoi Hajdari.
