Petrit Hajdari ka njoftuar se ka vendosur ta lirojë drejtimin e degës së Partia Demokratike e Kosovës në Drenas, duke thënë se ky vendim erdhi me kërkesë të kryetarit të partisë, Bedri Hamza.
Përmes një postimi në Facebook, Hajdari tha se nuk dëshiron t’u bëhet pengesë proceseve të nevojshme brenda partisë.
“Në Degën e PDK-së në Drenas kemi korrur sukses të jashtëzakonshëm në zgjedhjet e fundit nacionale, duke dalë dega më e fuqishme e PDK-së. Me besimin se duke e çuar përpara PDK-në e çojmë përpara Kosovën, angazhimi ka qenë i përhershëm e i përditshëm. Megjithatë, duke mos dashur t’i bëhem pengesë proceseve të nevojshme, me kërkesë të kryetarit të PDK-së Bedri Hamza, kam vendosur sot ta liroj degën e PDK-së në Drenas dhe ta fokusoj kontributin në kryesinë qendrore”, ka shkruar Hajdari.
Ai tha se po largohet nga drejtimi i degës duke lënë pas një rezultat të lartë elektoral.
“Po e lë degën e PDK-së me mbi 18 mijë vota dhe me krenarinë e performancës në zgjedhjet më të vështira nacionale ndonjëherë”, u shpreh ai.
Hajdari theksoi se do të vazhdojë të kontribuojë për partinë dhe vendin, pavarësisht pozitës që do të ketë.
“Vazhdoj të jem i përkushtuar për të kontribuar për PDK-në e për vendin, pavarësisht nga cila pozitë. E falenderoj thellësisht ish-kryetarin Memli Krasniqi për besimin e bashkëpunimin dhe kryetarit Hamza i uroj suksese në zgjedhjet e radhës, ku ofroj kontributin e angazhimin tim”, ka shkruar ai.
Ai falënderoi gjithashtu strukturat e partisë dhe qytetarët e Drenasit për mbështetjen ndër vite.
“I falenderoj qytetarët e Drenasit dhe secilin që ka qenë pjesë e këtij rrugëtimi për besimin dhe mbështetjen. Shpresoj që pozitën që po e liroj unë, ta marrë një figurë e pakorruptuar, përbashkuese e jopërçarëse. Drenasit i nevojitet unifikim”, tha Hajdari.
Në fund, ai u shpreh krenar për kontributin e dhënë në PDK dhe për trashëgiminë politike të Hashim Thaçi dhe Kadri Veseli.
“Ka qenë nder për mua t’i shërbej vizionit për një Kosovë më të mirë, trashëgimisë së Hashim Thaçit e Kadri Veselit. Do ta vazhdoj kontributin me besimin që e mira e PDK-së është e mira e vendit”, përfundoi ai.
