Drejtori i së ashtuquajturës Zyrës për Kosovën në Qeveri të Serbisë, Petar Petkoviq, ka thënë sot se mandati i Ekipit Menaxhues për hartimin e Statutit të Asociacionit të Komunave me shumicë serbe, zgjat deri në përfundimin e procesit të formimit të Asociacionit dhe “nuk ka bazë ligjore që Albin Kurti në mënyrë të njëanshme dhe arbitrare ta shkarkojë atë organ”.
Këto deklarime të Petkoviqit vijnë disa orë pasi kryeministri Kurti tha se ekipi menaxhues për hartimin e draft-statutit të Asociacionit të komunave me shumicë serbe ka përfunduar misionin dhe funksionin e vet dhe se lirimi i ekipit nga puna është i natyrshëm dhe i logjikshëm.
“Fakti që nuk i pëlqen drafti i Statutit të Asociacionit është problem i tij personal, sepse mandati i Ekipit Menaxhues ekzistues është aktiv dhe i vlefshëm, i konfirmuar në disa raste nga përfaqësuesit e Bashkimit Evropian, por edhe nga Përfaqësuesi i Lartë i BE-së për Politikë të Jashtme dhe Siguri, Josep Borell. Prandaj, përpara se Kurti të kontestojë funksionimin e Ekipit Menaxhues, le ta përtërijë materialin dhe le ta rilexojë deklaratën e zëdhënësit të BE-së, Peter Stano se ekipi menaxhues nuk mund të zëvendësohet në mënyrë të njëanshme, sepse ata janë pjesë e procesit të dialogut dhe se për ta është ende e vlefshme përbërja e atij ekipi”, tha Petkoviq, transmeton Tanjug.
Sipas fjalëve të tij, edhe përfaqësuesi i lartë i BE-së, Borell, në fjalimin e tij, pas raundit të fundit të dialogut më 2 maj, theksoi se BE-ja do të vazhdojë të ftojë ekipin menaxhues në takime në Bruksel nëse është e nevojshme.