Lista Serbe ka nisur një peticion kundër ndërtimit të dy urave të reja midis Mitrovicës së Jugut dhe asaj të Veriut. Peticioni, sipas deklarimeve, është ndërmarrë për të shprehur vullnetin dhe qëndrimin e shumicës së popullsisë në veri. Megjithatë, situata nuk është tamam ashtu, pasi “vullneti i qytetarëve” po përdoret për qëllime elektorale, jo vetëm sepse është iniciuar në prag të zgjedhjeve lokale të planifikuara për 12 tetor në Kosovë, por sipas burimeve të portalit “Veritas.Info”, ai po shërben si mjet për numërimin e votuesve dhe për kontrollin e disiplinës zgjedhore.
Milija Biševac, kryetar i lëvizjes politike “Lëvizja Popullore Serbe”, deklaroi se nënshkruesit e peticionit janë peng i retorikës politike të Listës Serbe. “Sa i përket peticionit të organizuar nga Lista Serbe, unë e shoh kryesisht si një instrument për mobilizimin dhe rivlerësimin e trupës së tyre votuese. Nënshkrimi i këtij peticioni më shumë i ngjan një metode për numërimin e votuesve të paracaktuar, sesa një forme të rezistencës politike. Në fund, qytetarët e Mitrovicës bëhen sërish peng i gjesteve simbolike dhe ekzagjerimeve politike, ndërkohë që çështjet thelbësore mbesin të pazgjidhura,” tha Biševac.
Në anën tjetër, ka edhe qytetarë që janë detyruar ose shtyrë ta nënshkruajnë peticionin — kryesisht ata që punojnë në institucionet paralele të Serbisë ose marrin ndonjë formë të të ardhurave nga Serbia. Një prej tyre është arsimtari Dejan Milović, i cili tregoi se e nënshkroi peticionin vetëm sepse e kishte kërkuar drejtoresha. “Ishte një kërkesë e drejtpërdrejtë e saj që të shkoja te çadra dhe të nënshkruaja. Nuk është se do ta kisha bërë vetë, sepse nuk besoj që kjo do të sjellë ndonjë ndryshim,” tha Milović.
Nënshkrues të tjerë të peticionit, që kërkuan të mbeten anonimë për portalin tonë, tregojnë se janë thirrur nga drejtorët e ndërmarrjeve publike. “Është një nënshkrim kolektiv që ngjan shumë me votimin kolektiv që kjo parti përdor. E dimë se kjo nismë nuk mund ta ndalë ndërtimin e urave, por jemi të detyruar të nënshkruajmë, sepse jemi thirrur nga drejtorët përkatës,” deklaroi B.J., 48 vjeç, duke kërkuar të mbetet anonim.
Nga ana tjetër, Lista Serbe pretendon se ka mbledhur 3.628 nënshkrime. Ky numër dëshmon se veprime të ngjashme, si iniciativat për shkarkimin e kryetarëve të komunave, janë ndërmarrë në të njëjtën mënyrë. Është interesante që iniciativat e mëparshme nuk janë çuar deri në fund, nuk janë hedhur në referendum, dhe prandaj mund të thuhet me siguri se kanë qenë të pasuksesshme. Nënshkruesit e peticionit janë kryesisht persona që janë tërhequr nga sistemi i Kosovës, ndërsa punimet për ndërtimin e urave po vazhdojnë pa probleme dhe me intensitet të plotë.
