Sot bëhen pesë vjet që nga publikimi i aktakuzës së Prokurorit të Specializuar pranë Dhomave të Specializuara të Kosovës në Hagë, me të cilën u akuzuan ish-udhëheqësit e Ushtrisë Çlirimtare të Kosovës: Hashim Thaçi, Kadri Veseli, Jakup Krasniqi dhe Rexhep Selimi.
Të katërt ndodhen ende në paraburgimin e Dhomave të Specializuara në Hagë, ku po zhvillohet procesi gjyqësor për krime lufte dhe krime kundër njerëzimit, që pretendohet të jenë kryer gjatë viteve 1998–1999 në disa zona të Kosovës dhe në pjesë veriore të Shqipërisë.
Sipas aktakuzës, këto krime dyshohet se u kryen kundër qindra civilëve dhe personave që nuk morën pjesë në luftime. Zyra e Prokurorit pretendon se të akuzuarit, në cilësinë e drejtuesve të UÇK-së, mbajnë përgjegjësi komanduese dhe individuale për veprimet e pjesëtarëve të organizatës. Numri i viktimave të pretenduara në dosje përmendet të jetë rreth 150.
Pas konfirmimit të aktakuzës në nëntor të vitit 2020, Thaçi, i cili në atë kohë ushtronte funksionin e Presidentit të Republikës së Kosovës, dha dorëheqje dhe së bashku me Veselin, Krasniqin e Selimin u transferua në Hagë. Në seancat e para, të gjithë u deklaruan të pafajshëm.
Gjykimi ka nisur më 3 prill 2023 dhe, pas përfundimit të paraqitjes së provave nga Prokuroria më 15 prill 2025, procesi ka kaluar në fazën e mbrojtjes. Mbrojtja e Thaçit dhe Krasniqit ka paralajmëruar paraqitjen e provave të veta, ndërsa ekipet e Veselit e Selimit kanë vendosur të mos dorëzojnë prova shtesë.
Në javët e ardhshme, pritet që si dëshmitar i mbrojtjes të dëshmojë edhe ish-komandanti suprem i NATO-s gjatë luftës së Kosovës, gjenerali Wesley Clark.
Pesë vjet pas ngritjes së aktakuzës, çështja vazhdon të ngjallë reagime në Kosovë dhe më gjerë. Në Prishtinë, Tiranë e Hagë janë zhvilluar protesta në mbështetje të të akuzuarve, me kërkesa për drejtësi dhe lirimin e tyre.
Megjithatë, Dhomat e Specializuara kanë refuzuar disa herë kërkesat që ish-krerët e UÇK-së të mbrohen në liri, duke arsyetuar vendimet me rrezikun e ndikimit të mundshëm në dëshmitarë dhe procesin gjyqësor.
