Një shpërthim i fuqishëm goditi një fabrikë kimike në provincën lindore Shandong të Kinës të martën rreth mesditës, duke shkaktuar të paktën pesë viktima dhe duke plagosur 19 persona të tjerë, raportoi televizioni shtetëror CCTV.
Gjashtë persona rezultojnë ende të zhdukur, raporton AP.
Shpërthimi ishte aq i fortë sa theu dritaret e një magazine që ndodhej më shumë se tre kilometra larg, sipas një banori lokal, i cili dëshmoi se shtëpia e tij u drodh nga goditja dhe më pas pa një kolonë të madhe tymi që ngrihej në distancë.
Ngjarja ndodhi në fabrikën Gaomi Youdao Chemical Co., e cila ndodhet në një park industrial në qytetin Weifang. Kompania, që punëson mbi 500 njerëz, prodhon pesticide dhe kimikate për përdorim mjekësor.
Më shumë se 230 zjarrfikës u dërguan në vendngjarje për të përballuar situatën, sipas autoriteteve kineze. Shkaku i shpërthimit po hetohet.
