Policia e Kosovës ka arrestuar pesë persona në Gjilan, të cilët dyshohet se kanë kryer një vjedhje të rëndë disa ditë më parë.
Sipas hetimeve, të dyshuarit kishin hyrë me forcë në shtëpinë e një qytetari, nga ku kishin marrë sende të ndryshme me vlerë. Pas veprimeve policore, të gjitha gjësendet e vjedhura janë gjetur dhe i janë kthyer pronarit.
Në bazë të raportit 24-orësh të Policisë së Kosovës, pas identifikimit dhe arrestimit, me vendim të prokurorit të shtetit, pesë të dyshuarit janë dërguar në mbajtje, ndërsa rasti po trajtohet sipas procedurave ligjore.
“Janë identifikuar dhe arrestuar pesë të dyshuar meshkuj kosovarë pasi që ditë më parë dyshohet se kishin depërtuar me forcë në shtëpinë e viktimës mashkull kosovar, ku kishin vjedhur gjësende të ndryshme. Gjësendet e vjedhura i janë kthyer pronarit, ndërsa me vendim të prokurorit të dyshuarit janë dërguar në mbajtje”, thuhet në njoftim. /teve1.info/
