Ishte paralajmëruar se do të bllokohej për pesë ditë për shkak të punimeve.
Mirëpo, rruga “Ilir Konushevci” në Prishtinë vazhdon të mbetet e bllokuar.
Përveç që ende nuk është liruar për qarkullim, kjo rrugë pritet edhe të ngushtohet krahasuar me gjendjen që kishte para fillimit të punimeve.
Ky vendim nuk është pritur mirë nga qytetarët dhe bizneset.
Sipas tyre, bllokimi i rrugës dhe vonesat në përfundimin e punimeve po krijojnë vetëm tollovi, ndërsa ndryshimet e planifikuara po i dëmtojnë edhe bizneset që ndodhen përgjatë saj.
“Po shpresoj që po punohet për të mirë, që të bëhet më mirë se sa ka qenë. Mirëpo, nëse bëhet më keq, ajo do të shihet. Të shpenzohen para e të bëhet më keq, këtë nuk e merr mendja askush”, u shpreh një qytetar.
Ndërkaq, sipas qytetarëve përveç vonesave, nisja e punimeve në periudhën kur ka fluks të madh të diasporës po e vështirëson edhe më shumë qarkullimin.
“Unë jam në pension dhe i kam fëmijët që shkojnë në punë. Atyre u duhet mbi një orë e gjysmë për t’u kthyer në shtëpi. Kjo ua ka vështirësuar jetën dhe punën.Kjo është një iniciativë e mirë, por duhet të zgjidhet koha e duhur për realizimin e saj, si nata ose vikendi qe sot e bllokume”, tha qytetari tjetër.
Për këtë rrugë, ditë më parë reagoi edhe ish-kryetari i kësaj komune, Isa Mustafa, duke shtuar se udhëheqësit e komunës nuk kanë të drejtë të eksperimentojnë në këtë mënyrë.
“Njëra nga arteriet kryesore për Llap e Gollak dhe nga Llapi. Rrugë që u zgjerua në 12 metra nga koha kur reformatori i madh i Prishtinës, Nazmi Mustafa ishte kryetar. Banorët kanë të drejtë të protestojnë dhe kundërshtojnë, sepse besoj që është vendim arbitrar, cili nuk respekton interesat e banorëve, të bizneseve të vogla dhe të qytetarëve të Kosovës”, u shpreh ish kryetari i kësaj Komune,Isa Mustafa.
Rruga Ilir Konushevci, si dhe disa rrugë të tjera, ishin bllokuar për punime nga Komuna e Prishtinës më 22 korrik, për një periudhë prej pesë ditësh. Mirëpo, punimet nuk kanë përfunduar brenda afatit të paraparë.
Për rastin Tëvë1 ka provuar te kontaktojë edhe me Komunën e Prishtinës mirëpo të njëjtit nuk qenë të qasshëm.
