Nga qyteti i Prizrenit, ata vlerësuan se nevojitet krijimi i më shumë urave të bashkëpunimit në mes të gjithë vendeve.
Kryetari i Komunës së Prizrenit, Shaqir Totaj foli për rëndësinë e kësaj date dhe rrjedhën e ngjarjeve historike të vendeve shqiptare.
“Takimi i sotëm është hap i rëndësishëm drejt intensifikimit të marrëdhënieve në mes te shteteve tona, shkëmbimi i përvojave nga zonat ku jetojmë është mundësi e artë për të reflektuar për ndryshimet qe na plotësojnë e na bashkojnë e na pasqyrojnë historinë e veçantë. Ky takim sot të shërbejë në funksion të ndërtimit të urave të bashkëpunimit”, tha Totaj.
Në këtë takim, mori pjesë edhe Tirana.
Kryetari Erion Veliaj tha se synojnë rritjen e bashkëpunimit në mes të shqiptarëve dhe mes komunave që përfaqësojnë duke bërë punë të mira për qytetarët.
“Sigurisht koha është tjetër, situata është krejt tjetër nga ajo e 144 viteve më parë, ne nuk jemi në luftë, jemi në paqe, ne nuk kemi rreziqe territoriale, synimi ynë nuk është vendosja e kufijve, përkundrazi shkrirja e kufijve dhe rritja e bashkëpunimit në mes vete, nuk ka konflikte dhe jemi të gjithë në një emërues të përbashkët për nevojën dhe domosdoshmërinë e komunikimit dhe dialogut në mes nesh”, deklaroi Veliaj.
Nga Tirana e Prishtina, kryetari i Preshevës, Shqipërim Arifi kërkoi interesim më të madh për Luginën e Preshevës.
“Presheva është pjesë e kombësisë shqiptare, e shqiptarët e Luginës së Preshevës e presin Tiranën, Prishtinën, Tetovën, e presin Prizrenin, e pret edhe Qeverinë e Kosovës dhe Qeverinë e Shqipërisë për të qenë shumë më prezent sesa janë, fatkeqësisht shumë më prezentë. Në ketë kontekst unë këtu sot dua të apeloj pikë së pari të kolegët e mi, ne jemi kryetar komune mundemi të punojmë shumë më shumë së bashku”, u shpreh Arifi.
Në anën tjetër, kryetari i Komunës së Tetovës, Bilall Kasami tha se po angazhohen për ndërtimin e rrugës Tetovë-Prizren.
“Lidhja e dy qyteteve tona do të ishte një lidhje tjetër që do të na bashkonte në angazhimin e përbashkët për te qenë më afër njëri-tjetrit në kohën kur kufijtë po bëhen gjithnjë e më të parëndësishëm, në kohën kur bashkëpunimi vlerësohet si themel i perspektives evropiane”, deklaroi Kasami.
Kjo ngjarje konsiderohet si kthesa më e rëndësishme e kombit shqiptar për bashkimin e tyre.
Raporti i gazetares Fetije Kamberi.