Në komunën e Mitrovicës sot u përurua pllaka e komandantit legjendar, Adem Jashari. Vëllai i tij Rifat Jashari uroi të gjithë qytetarët, ndërsa kryetari i komunës, Bedri Hamza tha se familja Jashari janë simbol i historisë së Kosovës.
Me flamuj e nën ritëm muzikor, u mblodhën për të festuar.
Përveç 16-vjetorit të Pavarësisë së Kosovës, qytetarët e Mitrovicës, festuan edhe përurimin e shtatores së heroit legjendar, Adem Jashari.
Nuk vonoi shumë, u bë edhe shpalosja e shtatores.
E për këtë, vëllai i tij uroi dhe falënderoi komunën për organizimin.
“Urime së pari pavarësia të gjithëve, çka jeni këtu dhe gjithë shqiptarëve kudo që ndodhen brenda dhe jashtë trojeve të veta. Urime edhe shtatorja, ishalla gjitha shtatoret i gëzojnë së bashku”, tha vëllai i Adem Jasharit, Rifat Jashari.
Në këtë ceremoni i pranishëm ishte edhe kryetari i komunës, Bedri Hamza.
“Sakrifica e familjes Jashari, simbolizon dhe sintetizon historinë e të gjithë familjeve të Kosovës për liri dhe Pavarësi. Sakrifica e kësaj familje, me kryekomandantin Adem Jashari, vuri në lëvizje historinë”, tha kryetari i Mitrovicës, Bedri Hamza.
E autori i kësaj vepre tha se realizimi i shtatore ka qenë përgjegjësi e madhe.
“Ka qenë përgjegjësi e madhe, për mu me realizu veprën sepse është njeriu kryesor i kësaj dite që ne e festojmë”, tha skulptori Sabri Behramaj.
E në këtë ditë feste, qytetarët mitrovicas kërkuan unitet.
“Urime pavarësia e Kosovës me 17-in, faleminderit prej Allah-ut, që na ka shpallur Pavarësinë, i lumi ALLAH, maspari, shoqëria, vllaznia edhe edhe gjithë Kosovarët tanë. Duhet me mbajtë pak, me kanë si të shtrënguar, të lidhun të bashkuar ku është bashkimi ku është razia, është perëndia”, tha qytetari, Hamdi Osmani.
Entuziast u shpreh edhe ky fëmijë.
“Unë jam shumë krenar me shtetin tem, sepse janë bërë shumë sakrifica”
Në këtë ceremoni, pjesëmarrës ishin një numër i madh i qytetarëve.
