Nga data 2 dhjetor, qytetarët e Komunës së Podujevës dhe më gjerë do të kenë mundësi të marrin shërbime shëndetësore në urgjencën mjekësore “Doha”. Nga ky përurim Kryeministri Kurti tha se kjo urgjencë është e rëndësishme edhe për qytetarët e Luginës.
Ashtu siç e do zakoni, në fillim e prenë shiritin.
Kryeministri Albin Kurti së bashku me Ambasadorin e Katarit në Tiranë dhe Prishtinë, Jaber Ali Adouseri dhe Drejtorin e përgjithshëm të Qatar Charity, Yousuf Ali Kuwari bënë përurimin e Urgjencës Mjekësore DOHA në Komunën e Podujevës.
E krah të tyre ishte edhe i pari i Podujevës, Shpejtim Bulliqi.
Pasi bëri hapjen e kësaj ceremonie, tregoi për investimet që janë bërë në këtë projekt.
“Ky projekt i realizuar në bashkëpunim me ‘Qatar Charity’, kap shifrën e 1.7 milion euro, ku 600 mijë euro janë investuar nga Komuna, kurse 1.1 milion euro nga kjo organizatë. Ky investim dëshmon përkushtimin tonë për të sjellë shërbime të shpejta dhe cilësore për qytetaret tanë të Podujevës”, ka thënë ai.
Ndërsa kryeministri, Albin Kurti tha se kjo urgjencë do të shërbejë jo vetëm për Podujevën por edhe më gjerë.
“Është një projekt me rëndësi madhore për Podujevën. Duke pasur parasysh pozicionimin strategjik përkatësisht edhe afërsinë me pikën kufitare në Merdarë, urgjenca do të na shërbejë jo vetëm për qytetin dhe mbarë vendin, por edhe rajonin e veçanërisht bashkatdhetarët nga Lugina të cilët mund të përfitojnë nga ofrimi i shërbimit mjekësor”, ka deklaruar Kurti
Ndërsa Ambasadori i Kataritnë Tiranë dhe Prishtinë, Jaber Ali Adouseri u shpreh se ky projekt pasqyron raportet e mira ndërmjet dy shteteve.
“Ky projekt pasqyron thellësinë e marrëdhënieve ndërmjet shtetit Katarit dhe Republikës së Kosovës, dhe shpreh përkushtimin e Katarit për të përmbushur projektet zhvillimore dhe shëndetësore që i shërbejnë shoqërisë kosovare dhe kontribuojnë në rritjen e stabilitetit të mirëqenies së saj”.
Ndër të tjera, shërbimet në këtë ndërtesë, zyrtarisht qytetarët do të fillojnë t’i marrin nga data 2 dhjetor.
