Zjarret që kapluan kodrat e Hollivudit të mërkuren mbrëma, rrezikuan edhe pjesët më ikonike të Los Anxhelosit, përderisa zjarrfikësit mundohen të fikin edhe tre zjarre të tjera të mëdha që mbyten 5 njerëz, dhe detyruan të evaukohen 130,000 të tjerë.
Shëtitorja e Famës në Hollivud ishte plot me lëvizje dhe rrugët rreth Teatrit Kinez TCL dhe Madame Tussauds ishin mbushur me trafik të ngadaltë, ndërsa sirenat bërtisnin dhe helikopterët fluturonin ulët për të hedhur ujë mbi flakët, të cilat ishin vetëm rreth një milje larg. Njerëz që mbartnin valixhe linin hotelet, ndërsa disa spektatorë po shkonin drejt flakëve, duke regjistruar zjarrin me telefonat e tyre, raporton AP
Gati 2,000 shtëpi, biznese dhe struktura të tjera janë shkatërruar nga këto zjarre – të quajtura Zjarret e Palisadës dhe Eaton – dhe pritet që numri të rritet. Pesë vdekjet e regjistruara deri tani janë nga Zjarri i Eaton.
Në Pasadena, Shefi i Zjarrfikësve Chad Augustin tha se sistemi i ujit të qytetit ishte i mbingarkuar dhe ishte penguar më tej nga ndërprerjet e energjisë, por edhe pa këto probleme, zjarrfikësit nuk do të kishin mundur të ndalonin zjarrin për shkak të erërave të fuqishme që përhapnin flakët.
