Gjykimi në rastin e njohur si “400 kilogramë kokainë” është afër përfundimit.
Pas prezantimit të provave materiale, mbrojtja e të akuzuarve për kokainën e ardhur nga Brazili, që u gjet në kamionët e kompanisë “MC Food”, nisi sfidimin e tyre.
Avokati i të akuzuarit kryesor, pronarit të kompanisë, Izet Sheqiri, e sfidoi provën e prokurorisë për pamjet e të akuzuarve në vendin e ngjarjes, pasi kishin arritur kamionët me narkotikë.
“Po rrin kamioni aty me narkotikë, s’pe kshyrin asnjani. A s’i kish tërheq kureshtja me çel pak derën, veç me thanë çka u bo qetu, a ish aty, po ish aty, mshele derën edhe po ikim. Ose me thirrë dikon, hajde shpraze t’shtunën e t’dillën, sa s’o kërkush k’tu. Po me lanë t’hanën kur t’vijnë 100 punëtorë aty”, ka thënë Latifaj
Latifaj, kërkoi që për të vërtetuar pafajësinë e Sheqirit, Gjykata të bashkëpunoj edhe me SPAK-un e Shqipërisë rreth të dhënave për këtë rast të trafikimit të drogës në aplikacionin SKYECC, që njihet si platformë e cila përdoret nga trafikuesit e drogës.
“As s’ka porosit, as s’ka pagu trafikantë droge e as kurgjo. As kurrë n’jetë me këtë punë nuk është marrë, as n’andërr, as n’film se ka pa. Ju kisha lut, qysh ju kom lut herën e kalume, të interesoheni tek SPAK-u, pasi tash i kanë kap SKYECC telefonat, edhe të interesoheni mos dikush dikur po e përmend këtë punë, sepse është e pamundur mos me përmend…. Gjithë ata që janë marrë me kësi lloj aktivitetesh, paskan pasë SKYECC në telefona, qysh është e mundur që veç Izet Sheqirit nuk i dul, që ka pasë ose ka përdor najherë SKYECC. Qysh po thotë prokuroria, ky oshtë bossi i krejt qatyne, po flitet për 1 ton kokainë brenda një muaji”, shtoj Latifaj.
Ai përmendi edhe mungesën e kërkimit të llogarisë ndaj të akuzuarve për kapjen e drogës nga organet e drejtësisë.
“Po qysh ka mundësi me mungu gjysë toni kokainë, edhe kërkujna kërkush mos m’i shkru, më thanë çka u bo. Masi këta kokan. Po dikush dikujna i ka shkru, po jo këta kërkujt. As kërkush këtyre”, ka thënë tutje Latifaj.
Mbrojtësi i Izet Sheqirit, e përsëriti ofrimin e dorëzanisë prej 10 milionë euro, në mënyrë që klientit të tij t’i mundësohet lirimi me kusht ose arresti shtëpiak.
Në mesin e të akuzuarve janë edhe Faton Vrajolli, Kadri Sheqiri, Kadri Rrahimi e Fehmi Bytyqi.
Mbrojtja e Faton Vrajollit derisa kërkoi lirimin e tij, përmendi gjendjen jo të mirë shëndetësore të Vrajollit dhe mungesën e ofrimit të trajtimit shëndetësor për të në institucionet e Shërbimit Korrektues.
“Nga neglizhenca e shëndetësisë së burgjeve, i njëjti ka humbur një pjesë të gishtit të madh të dorës. Gjatë muajit të kaluar është ridërguar për rezonancë dhe është ricaktuar rezonancë për 11.07, pra gjendja e gishtit të tij dhe sëmundjes nuk është stabilizuar. Në rastin konkret, nuk kemi të bëjmë me një sëmundje të thjeshtë, por me kancer, e cila metastazon shumë shpejtë. Me respekt ndaj kësaj Gjykate, klienti im nuk ka insistuar të lirohet pa u pastruar nga njolla e zezë që iu është bërë me këtë aktakuzë. Por, konsideroj se edhe me konventën e të drejtave të njeriut, në rast të përkeqësimit të gjendjes së tij, shteti ynë do të mbahet përgjegjës. Si për mosofrim të kushteve për trajtim të tij brenda institucioneve brenda shërbimeve korrektuese, ashtu edhe jashtë QKUK-së”, Syla
Për shkak të temperaturave të larta, seanca u ndërpre pas sesionit të paraditës, për të vazhduar në një datë tjetër.
