Skuadra e Ferizajit U21 ka arritur një fitore me rezultat 2-1 ndaj Gjilanit U21, në një ndeshje të tensionuar në kampionatin e të rinjve. Por ajo që duhej të ishte një përballje sportive, ka përfunduar me skena të dhunshme pas përfundimit të takimit.
Sipas njoftimit zyrtar të klubit të Gjilanit, pas fishkëllimës përfundimtare ka shpërthyer një përleshje mes lojtarëve, ku thuhet se është përfshirë edhe kryetrajneri i Ferizajit U21, Fitim Sadriu.
“Pas përfundimit të ndeshjes, kryetrajneri i vendasve, Fitim Sadriu, ka goditur rëndë futbollistin tonë Tefik Ramadani, ndërsa më pas disa persona nga publiku kanë hyrë në fushë dhe kanë sulmuar futbollistët tanë,” thuhet në deklaratën e publikuar nga Gjilani.
Pamjet dhe detajet e incidentit pritet të shqyrtohen nga Federata e Futbollit e Kosovës (FFK), e cila pritet të marrë masa disiplinore ndaj personave të përfshirë, përfshirë trajnerin Sadriu.
Ky incident ka nxitur reagime të ashpra në opinionin sportiv, me thirrje për ndëshkime të rrepta ndaj dhunës në sport dhe për mbrojtjen e integritetit të garës.
