Një përplasje mes analistëve Nexhmedin Spahiu dhe Arton Demhasaj, lidhur me çështjen e legjitimitetit në zgjedhje, ka ndodhur në studion e Këndit të Debatit në Tëvë 1.
Ky i fundit duke folur për zgjedhjet e fundit në veri, ka ftuar kryeministrin Kurti që të gjejë një rast të vetëm kur një kryetar konsiderohet legjitim me dalje 3 % në zgjedhje.
“As ShBA dhe as aleatët nuk po thojnë dorëzojani veriun grupeve kriminale. Jo, qëllimi i partnerëve tanë ndërkombëtarë është që Kosovën me e çu përpara dhe jo prapa, me e rujt, me e zhvillu. Dhe këto veprime që po ndodhin tash në veri ata po e shohin të kundërtën. Derisa Rusia menzi pret me ndodh një konflikt i ri në Evropë apo kudo sepse tërhiqet vëmendja edhe nga lufta në Ukrainë, ne marrim veprime të tilla. Edhe çështja tjetër, nëse kryeministri Kurti ma gjen qoftë një rast të vetëm në botën demokratike që ti je kryetar legjitim me 3 % të votave, unë jam në rregull”, ka thënë Demhasaj.
Atij i ka reaguar Spahiu, duke thënë se dalja në zgjedhjet lokale në Prizren ishte 38 % dhe ka pyetur se a është relativ legjitimiteti.
“E kryetari i Prizrenit me 38 % të votave është legjitim apo. 38 % e votuesve kanë dalë në zgjedhje. A është relative legjitimiteti?”, ka pyetur Spahiu.
“Në tërë botën demokratike sillet 38, 42 apo 43 %, kaq është pjesëmarrja në zgjedhje. Por jo me 3 %”, i ka replikuar Demhasaj.
