Sot do të mbahet përpjekja e radhës e konstituimit të Kuvendit të Kosovës.
Në këtë seancë e cila pritet të nis nga ora 11:00, do të tentohet që për herë të 51-të të votohet kryetari i Kuvendit.
Kjo është java e fundit e konstituimit të Kuvendit sipas afatit 30 ditor të dhënë nga Gjykata Kushtetuese.
Të shtunën kryeministri në detyrë, Albin Kurti njëherit kryetar i Vetëvendosjes dhe Fatmir Limaj kryetar i Nismës Socialdemokrate kanë mbajtur një takim në përpjekje për të arritur një marrëveshje.
Nisma Socialdemokrate po kërkon postin e kryetarit të Kuvendit duke premtuar votën edhe për Qeverinë Kurti3. Por nga Lëvizja Vetëvendosje kanë thënë se janë të gatshëm për bashkëqeverisje me Nismën, por se posti i kryetarit të Kuvendit u takon atyre si partia fituese e zgjedhjeve.
E propozuara e Lëvizjes Vetëvendosje për kryeparlamentare, Albulena Haxhiu nuk po merr votat e mjaftueshme.
Kryesuesi i seancës, Avni Dehari në disa seanca me radhë po propozon votim të fshehtë për kryetare të Kuvendit, por që komisioni ad-hoc për këtë nuk po merr votat e mjaftueshme.
Opozita këtë ndryshim të formës së votimit po e cilëson si shkelje të rregullores.
Ndryshe, presidentja e Kosovës, Vjosa Osmani të martën në një konferencë për media, ka bërë të ditur se ka paraqitur një kërkesë të dytë në Gjykatën Kushtetuese, që përfshin edhe kërkesën për masë të përkohshme, me qëllim të pezullimit të rrjedhjes së afatit kushtetues prej 30 ditësh për konstituimin e Kuvendit të ri.
“Kërkesa për masë të përkohshme është mundësia që të shmangim futjen e institucioneve në një bllokadë pa fund, si dhe hyrjen në një situatë ku institucionet mund të krijoheshin në mënyrë kundërkushtetuese dhe të ishin të paafatshme. Kërkesa bëhet për të parandaluar dëmin e pariparueshëm dhe për të ruajtur interesin publik, dy kritere të cilat duhet të përmbushen për çdo kërkesë të tillë,” tha Osmani.
