Sot do të mbahet seanca e radhës për konstituimin e Kuvendit.
Kjo do të jetë tentativa e 23-të për konstituimin e Kuvendnit që nga seanca e parë e mbajtur më 15 prill.
Edhe kjo seancë që është paraparë të nis nga ora 11:00 nuk pritet të jetë e suksesshme, duke parë qëndrimet e partive politike.
Në rend dite është zgjedhja e kryeparlamentares së Kuvendit, ku e propozuar nga Lëvizja Vetëvendosje është Albulena Haxhiu.
Ajo po kundërshtohet nga PDK e AAK të cilat Haxhiun e kanë vlerësuar si figurë jounifikuese duke kërkuar nga LVV të jap një tjetër propozim, kurse LDK ka dhënë qëndrim se nuk e voton asnjë emër të propozuar nga Vetëvendosje.
Kurse, partia fituese e zgjedhjeve të 9 shkurtit ka thënë se partitë tjera nuk mund t’ia imponojnë kandidatin, duke kërkuar nga ata që të votohet Haxhiu.
Në seancat e fundit, kryesuesi i saj, Avni Dehari ka propozuar votim të fshehtë për kryetarin e Kuvendit. Nga LVV kanë thënë se me këtë formë votimi, Haxhiu do të votohej edhe nga disa deputetë të partive opozitare nga legjislatura e kaluar.
Ambasadori BE-së në Kosovë, ai i Gjermanisë dhe Francës, të mërkurën u kanë bërë thirrje partive politike që të formojnë institucionet sa më parë.
