Kandidati i Lidhjes Demokratike të Kosovës (LDK) për kryetar të Prishtinës, Përparim Rama, ka shpallur fitoren në zgjedhjet komunale, duke falënderuar qytetarët për mbështetjen dhe besimin e dhënë.
Në një konferencë për media të mbajtur pas publikimit të rezultateve preliminare nga KQZ-ja, Rama u shpreh i bindur se fitorja është rezultat i punës dhe përkushtimit të treguar gjatë mandatit të kaluar.
“Sot qytetarët e Prishtinës dhanë një mesazh të fortë e të qartë – ne duam zhvillim, vizion dhe transformim në një qytet metropolitan,” tha Rama.
Ai theksoi se qeverisja e tij ka ndërtuar bazat për një kryeqytet modern dhe se për katër vitet e ardhshme do të vazhdojë me të njëjtin angazhim për të realizuar projektet e nisura.
“Të gjithë e dimë se Prishtina është motori i zhvillimit në çdo fushë dhe si e tillë duhet të jetë fokusi dhe frymëzimi i të gjitha qeverisjeve qendrore,” shtoi ai.
Rama falënderoi veçanërisht votuesit e LDK-së për besimin e vazhdueshëm dhe e cilësoi këtë fitore si një konfirmim të punës së bërë dhe vizionit të tij për Prishtinën.
“Kjo fitore është rezultat i një përkushtimi të vazhdueshëm dhe një pune të sinqertë që ka pasur në qendër qytetarin,” tha në fund të deklaratës së tij.
