Kryetari i Prishtinës, Përparim Rama ka reaguar lidhur me çështjen e Ndërmarrjes Publike Banesore (NPB) dhe një kontrate të lidhur në vitin 2021.
Rama në një konferencë për media ka thënë se procesi është iniciuar dhe zhvilluar gjatë vitit 2021, në kohën kur Prishtina udhëhiqej nga Vetëvendosje.
Sipas tij, vendimi për këtë proces është marrë më 27 prill 2021, kontrata është nënshkruar më 17 maj, leja e ndërtimit është lëshuar më 16 gusht, ndërsa më 5 tetor është nënshkruar aneks-kontrata.
“Në as nuk e kemi iniciuar, as negociuar dhe as nënshkruar këtë kontratë. Përgjegjësia për këto vendime i takon qeverisjes para nesh në Prishtinë”, ka deklaruar Rama.
Ai ka thënë se gjatë mandatit të tij është kërkuar që çështja të trajtohet nga organet e drejtësisë, me qëllim të mbrojtjes së pronës publike të Kryeqytetit.
Sipas Ramës, NPB-ja aktualisht rrezikon të ngarkohet me mbi 32 milionë euro për fitimin e pretenduar të humbur nga një projekt që, siç thotë ai, nuk është ndërtuar asnjëherë.
Kryetari i Prishtinës ka ngritur pikëpyetje se si mund të kërkohet një shumë e tillë për fitim të humbur, kur projekti nuk është realizuar dhe pa u përcaktuar qartë se cili veprim i NPB-së ka shkaktuar mosrealizimin e tij.
Rama ka kërkuar gjithashtu sqarime për vendimin e Qeverisë së Kosovës të 12 gushtit për shpronësimin e një parcele në Lakrishte, duke theksuar se çështja vazhdon të jetë pjesë e një kontesti gjyqësor.
Ai i ka bërë thirrje Prokurorisë Speciale që të hetojë dokumentet, vendimet dhe nënshkrimet që lidhen me këtë proces dhe të përcaktojë përgjegjësitë.
“Ne nuk e kemi nënshkruar këtë kontratë. Ne nuk e kemi krijuar këtë problem. Por ne do ta mbrojmë pronën publike deri në fund”, ka deklaruar Rama./teve1.info/
