Qyteti i Durrësit u përfshi nga reshje të dendura shiu një ditë më parë, duke krijuar problematika në disa zona.
Agjencia Kombëtare e Mbrojtjes Civile në Shqipëri bëri të ditur se gjatë gjithë natës dhe sot, vazhdon puna nga forcat në terren për largimin e ujit nga zonat e prekura nga reshjet intensive të shiut, në një pjesë të bashkisë së Durrësit.
Sipas AKMC-së problematika më të theksuara kanë rrugët dytësore në zonën e Durrësit të Ri, Shkozetit, Gjykata e Apelit, pjesërisht Zona e Plazhit.
Mbrojtja Civile njofton se ka prani të ujit në një numër të konsiderueshëm banesash dhe ambientet publike dhe se është bërë evakuimi i disa familjeve, të cilat janë akomoduar te Kavalishenca.
“Sipërfaqja e tokës bujqësore nën ujë llogaritet në rreth 40 ha. Ka një rritje të lehtë të niveleve të lumenjve Ishëm dhe Erzen, por pa rrezik për daljen nga shtrati”, njofton AKMC, transmeton ATSH.
Ndërkaq hidrovorët në Hamallaj dhe Porto Romano vijojnë punën me kapacitet të plotë.
Në terren janë të angazhuara forca nga MZSH, Autoriteti Portual, Bordi i Kullimit, ndërmarrjet e punëve publike të bashkisë.
Sipas AKMC-së në mbështetje të forcave në terren janë angazhuar 2 pompa thithëse me kapacitet të lartë dhe 3 kamionë të kalueshmërisë së lartë nga Forcat e Armatosura.
“Gjatë natës kapacitetet nga FA u përforcuan edhe me 2 pompa të vogla nga batalioni i mbështetjes Poshnjë, të cilat janë duke punuar për largimin e ujit te IEPV Durrës”, njofton AKMC.
Grupet e punës janë në terren për identifikimin, vlerësimin dhe raportimin e saktë të dëmeve.
