Moti i keq me reshje intensive të shiut ka përfshirë vendin, ndërsa Agjencia Kombëtare e Mbrojtjes Civile raporton se situata në vend paraqitet kryesisht e qetë dhe pa probleme serioze në nivel kombëtar.
Megjithatë, në qarkun e Shkodrës, reshjet intensive pasditen e djeshme kanë dëmtuar segmentin rrugor Breg Lumi–Theth, ku 9 persona dhe 5 mjete mbetën të bllokuar. Falë ndërhyrjes së shpejtë të forcave bashkiake, Policisë së Shtetit dhe efektivëve të Forcave të Armatosura, personat u evakuuan me sukses. Aktualisht, rruga mbetet e bllokuar dhe po pastrohet nga inertet me mbështetjen e 10 efektivëve të FA.
Në bashkinë Fushë Arrëz janë raportuar ndërprerje të energjisë për shkak të erës së fortë. Ndërsa në qarkun e Lezhës, në aksin Lezhë–Shëngjin, rrëzimi i një peme ka dëmtuar linjat elektrike, duke shkaktuar ndërprerje të energjisë. Në rrugën Lezhë–Balldren, forcat operacionale po punojnë për pastrimin e inerteve nga rruga.
Në qarqet e tjera të vendit nuk raportohen problematika të veçanta nga moti.
Sipas Shërbimit Meteorologjik Ushtarak, gjatë 24 orëve të ardhshme priten reshje të herëpashershme me intensitet të ulët deri mesatar. Në Shkodër, Vlorë dhe Gjirokastër, reshjet do të intensifikohen në formë shtrëngatash, ndërsa nga pasditja deri në orët e para të mëngjesit priten reshje të shumta edhe në Lezhë, Durrës dhe Tiranë, të shoqëruara me shkarkesa elektrike. Parashikohet gjithashtu mjegull dhe shikueshmëri e reduktuar në zonat luginore.
Ministria e Mbrojtjes dhe Agjencia Kombëtare e Mbrojtjes Civile janë në gatishmëri të plotë, në koordinim me strukturat vendore, për përballimin e pasojave të mundshme nga moti i keq.
Situata në qarkun Vlorë
Qarku i Vlorës vazhdon të përfshihet nga stuhi ere, e cila ka bllokuar lundrimin e mjeteve të vogla, peshkarexhave dhe tragetit të linjës Brindisi. Si pasojë e erës, është ndërprerë energjia elektrike në disa njësi administrative, përfshirë Orikum, Shushicë, Novoselë dhe Selenicë. Era ka shkaktuar gjithashtu rrëzimin e pemëve në zonën e pyllit të Sodës, duke penguar qarkullimin.
Situata në qarkun Kukës
I gjithë territori i Kukësit është përfshirë nga reshje me intensitet mesatar deri të lartë. Gjatë natës janë regjistruar rënie gurësh dhe inertes në rrugët nacionale, por të gjitha akset mbeten të qarkullueshme. Ndërprerje energjie ka patur në disa fshatra të bashkive Kukës, Has dhe Tropojë. Furnizimi me ujë të pijshëm vijon sipas orareve të përcaktuara, ndërsa situata monitorohet në vazhdimësi.
Situata në qarkun Shkodër
Në Bashkinë Shkodër, reshjet mesatare nuk kanë shkaktuar ndërprerje energjie, por rruga Theth–Breg Lumi në fshatin Gimaj mbetet e bllokuar pas shembjes së masivit, ndërsa po punohet për zhbllokimin e saj.
Në Bashkinë Vau Dejës ka mungesë energjie në disa njësitë administrative, por reshjet janë të menaxhueshme.
Bashkia Pukë raporton reshje mesatare pa problematika të tjera, ndërsa në Bashkinë Fushë Arrëz, reshjet e forta me rrufe kanë shkaktuar ndërprerje energjie në disa zona.
Situata në qarkun Lezhë
Reshjet e dendura të shiut që kanë përfshirë Lezhën prej mesnatës kanë shkaktuar probleme të shumta, kryesisht në zonat urbane. Sasia e madhe e reshjeve ka sjellë përmbytje në bllokun e banimit “11 Janari” në lagjen “Besëlidhja”, si dhe në një sipërfaqe prej rreth 11.2 hektarësh. Përmbytje janë raportuar edhe në disa segmente të aksit Lezhë–Shëngjin.
Shirat e dendur kanë shkaktuar probleme edhe në zonën e Kallmetit, duke përmbytur disa hektarë tokë bujqësore.
Ndërkohë, në pjesën më të madhe të territorit raportohet edhe mungesë e energjisë elektrike për shkak të motit të keq.
Bashkia Kurbin: Shiu ka shkaktuar rritje të prurjeve në lumet Drojë dhe kanale, duke prekur rreth 50 banesa. Disa akse rrugore në Milot, Skuraj, Vinjollë, Gallatë, Fushë Mamurras dhe Shmëri janë të pakalueshme. Nuk ka nevojë për evakuime. Mjetet e rënda dhe grupet e shërbimeve janë në terren.
/rtsh.al/
