Në kazermën “Ushtarët e NATO-s” në Istog është përmbyllur gara tradicionale e Forcës së Sigurisë së Kosovës, “Ujku Garues 2026”, ku 20 ekipe nga njësitë e FSK-së kanë sfiduar njëra-tjetrën në disiplina të ndryshme ushtarake.
Ministri i Mbrojtjes, Ejup Maqedonci, ka bërë të ditur se gara, e cila është organizuar për herë të parë në vitin 2015, tashmë është shndërruar në një aktivitet tradicional të FSK-së, duke synuar forcimin e profesionalizmit, disiplinës dhe frymës së ekipit.
Në këtë edicion, vendin e parë e ka zënë Regjimenti i Dytë i Këmbësorisë (K2B2), ndërsa vendi i dytë i ka takuar Policisë Ushtarake të FSK-së.
Në vendin e tretë është renditur Regjimenti i Dytë i Këmbësorisë (K2MB).
“Urime Regjimentit të Dytë të Këmbësorisë (K2B2) për vendin e parë, Policisë Ushtarake të FSK-së për vendin e dytë dhe Regjimentit të Dytë të Këmbësorisë (K2MB) për vendin e tretë. Përgëzoj të gjitha ekipet pjesëmarrëse për angazhimin dhe nivelin e lartë të përgatitjes së treguar”, ka shkruar Maqedonci në Facebook.
Ai ka vlerësuar rëndësinë e këtyre garave në forcimin e aftësive profesionale dhe gatishmërisë së pjesëtarëve të FSK-së, duke theksuar se ato njëkohësisht ruajnë traditën dhe shpirtin garues brenda Forcës së Sigurisë së Kosovës./teve1.info/
