Aktivitetet e Shtëpisë së Kosovës në Davos në kuadër të Forumit Ekonomik Botëror, u përmbyllën mbrëmë me ‘Natën e Kosovës’.
Të pranishmëve iu adresua kryeministri Albin Kurti, e në mesin e të cilëve ishte prezent edhe ministri i Punëve të Jashtme dhe Çështjeve Evropiane të Kroacisë, Gordan Grlić Radman.
”Këto ditë ne kemi mirëpritur qindra vizitorë, mes tyre politikanë, diplomatë dhe drejtorë ekzekutivë e zyrtarë të biznesit, aktivistë nga shoqëria civile dhe qytetarë e sipërmarrës të diasporës sonë. Kjo përpjekje e madhe u bë e mundur përmes një pune ekipore që ka punuar pa u lodhur për ta realizuar këtë. Kjo nuk do të ishte e mundur pa mbështetjen, kontributin dhe ndihmën tuaj dhe ky është një falënderim i madh dhe një shenjë vlerësimi për punën tuaj të palodhur që keni bërë për shumë muaj”, tha Kurti, njofton zyra e kryeministrit.
Ai shtoi se ‘kjo ishte hera e parë që ne kemi hapësirën tonë këtu në Davos, por ne kemi bërë histori edhe duke pasur shtëpinë më të madhe’.
“Me padurim ju mirëpresim në Kosovë për të eksploruar bizneset, investimet ekonomike, mundësitë tregtare dhe të jeni të sigurt se në Republikën e Kosovës nuk gjeni vetëm treg por edhe një qeveri si partner”, u shpreh kryeministri.
Në përfundim, ai tha se kjo nismë shkon përtej pasqyrimit të Kosovës – ka të bëjë me bashkimin e diasporës sonë, ndërtimin e lidhjeve dhe demonstrimin se Kosova nuk i bashkohet vetëm bisedave globale por krijon platforma për t’i udhëhequr ato.
