Një përleshje fizike ka ndodhur të mërkurën rreth orës 17:40 në sheshin “Adem Jashari” në Lipjan, ku si pasojë dy persona kanë pësuar lëndime trupore.
Lajmin e ka konfirmuar për Tëvë1 zëdhënësja e Policisë së Kosovës për rajonin e Prishtinës, Flora Ahmeti, e cila bëri të ditur se në incident kanë qenë të përfshirë disa persona.
“Sot rreth orës 17:40 kemi marrë informatën për një përleshje fizike në sheshin ‘Adem Jashari’ në Lipjan. Bazuar në të dhënat fillestare, në këtë rast kanë qenë të përfshirë disa persona, dy prej të cilëve janë lënduar, njëri dyshohet se është lënduar me mjet të fortë, ndërsa tjetri me mjet të mprehtë”, ka deklaruar Ahmeti.
Sipas Policisë, personat e lënduar janë dërguar për trajtim mjekësor, ndërsa gjashtë persona janë shoqëruar në stacion policor, prej të cilëve tre janë të dyshuar në lidhje me rastin.
“Personat e lënduar janë dërguar për trajtim mjekësor, ndërkohë që policia ka shoqëruar në stacion gjashtë persona, prej tyre tre të dyshuar lidhur me këtë rast. Hetuesit policor, në koordinim me prokurorinë, janë duke punuar për sqarimin e rrethanave të këtij rasti”, ka shtuar Ahmeti.
Policia e Kosovës ka bërë të ditur se hetimet janë në vazhdim dhe se do të ndërmerren të gjitha veprimet e nevojshme ligjore.
