Euroliga të premten ka marrë një vendim në lidhje me dënimet për përleshjen brutale që ndërpreu ndeshjen e mbrëmshme në plejof mes Real Madridit dhe Partizanit.
Të dy klubet u gjobitën me nga 50 mijë euro. Guerschon Yabusele i Realit e pësoi më keq, duke marrë pezullim prej pesë ndeshjesh.
Kevin Punter i Partizanit u pezullua me dy ndeshje. Gabriel Deck (Real) dhe Mathias Lessort (Partizan) u pezulluan me nga një ndeshje, me vërejtjen se nuk ka të drejtë ankimimi.
Pas faullit të Sergio Llull ndaj Punterit kur kishin mbetur edhe 1 minutë e 40 sekonda nga loja, kapiteni i Partizanit dhe legjenda e Realit u përleshën.
Basketbollistët e tjerë u përfshinë shpejt dhe i gjithë kaosi filloi nga Deck, i cili filloi të godiste Exumin dhe Punterin me grushte.
Pasoi një sherr i përgjithshëm, ku nuk dihej se kush kë po godiste dhe më pas Yabusele e hodhi në dysheme Dante Exumin me një lëvizje të arteve marciale dhe e lëndoi rëndë.
Gjithsej 21 basketbollistë nga të dyja ekipet u përjashtuan dhe ndeshja u regjistrua me rezultatin që ishte në fuqi në momentin e ndeshjes (95:80).
Partizani po udhëheq befasisht 2:0 në seri, dhe i duhet një fitore nga dy ndeshjet e ardhshme [nëse do të jetë nevoja] që do të luhen në Beograd për t’u bërë pjesë e “Final Fourit” të Euroligës.
