Buxheti i miratuar i Asamblesë Komunale të Prishtinës, më në fund është përfshirë në projektbuxhetin e vitit 2026.
Kështu u vendos sot në komisionin parlamentar për Buxhet dhe Financa, me dhjetë vota për, asnjë kundër dhe asnjë abstenim.
Buxheti për Prishtinën, bashkë me atë të komunës së Shtimes, do të shqyrtohen në lexim të dytë nga Kuvendi.
Para pak ditësh, kryetari i Prishtinës, Përparim Rama, iu drejtua me një letër ministrit të Financave Hekuran Murati, duke i kërkuar që buxheti i Prishtinës të përfshihet në Ndarjet Buxhetore të vitit 2026.
Megjithatë, nga opozita në kryeqytet, thonë se situata e krijuar me buxhetin, është si pasoj e vet kryetarit Rama.
“Këtu nuk kemi të bëjmë me bllokadë nga Qeveria e Kosovës në asnjë mënyrë, por kemi të bëjmë me vonesat e kryetarit Rama, siç i ka edhe në shumë projekte tjera e poashtu edhe në këto vendime siç është buxheti i Prishtinës”, tha Besart Krasniqi nga LVV.
E po të mos përfshihej kryeqyteti në buxhetin e vitit 2026, ekonomisti Safet Gërxhaliu, thotë se do të kishte shumë pasoja.
“Lënë gjurmë negative sepse po politizohet apo mund të kuptohet si e politizuar në aspektin ekonomikë, kjo është një ngufatje e Komunës dhe e biznesit të cilët përmes projekteve në partnerit publiko- privat ata janë implementuar dhe tani nuk do të kenë mundësi. Qytetarët e Prishtinës janë të zhgënjyer dhe kur kësaj i shtohet fakti që Prishtina do të jetë nikoqirë e Lojërave Mesdhetarë të viti 2030, kam drojë që Kosova po rrezikohet të humbë kredibilitetin e vet”, vlerëson Gërxhaliu.
Kuvendi Komunal i Prishtinës ka aprovuar buxhetin e viti 2026 më gjashtë shkurt./teve1.info/
