Malli për të birin nuk i është shuar as pas 26 vitesh.
E me kujtimet më të mira për të jeton edhe sot nënë Mehdije Veliqi.
Ajo kujton kohën kur i biri Besimi bashkë me dy vëllezërit ranë në duart e armikut.
“Në Gllobarë tre djem i kam pas në burg, dy i kanë lëshuar këta a e kanë qu të gjallë te serbët a e kanë vra këtu e kanë qu atje mas 4 viteve na e kanë kthyer”, thotë ajo.
Me lot në sy, nënë Mehdija e përshkruan 22 vjeçarin si djalë shumë punëtor.
“Ohh e kujtoj boll, po s’kam çka me bë .Shumë djalë i mirë u kanë shumë jam shëmtu për të. U kanë punëtorë, kurrë askujt nuk ia ka prish shumë shumë krejt e kanë deshtë”, thotë Veliqi.
E martir në lagjen “Veliqi” në Polluzhë të Drenasit, kishte rënë edhe 17-vjeçari, Burim Veliqi.
Motra e tij tregon momentet e fundit që kishte pasur me të.
“Ishte në një aksion në fshatin Polac ku ishin të organizuar si ushtri. Momentet e fundit kur jemi përshëndet me të ishin para shtëpisë sonë. Ishte krenar ishte me ndjenja shumë të mira për me dhanë jetën për lirinë e Kosovës e asnjëherë nuk e shuajt këtë ëndërr edhe që është bë realitet. Gjaku i tyre u bë liri për ne”, shprehet Sevdije Veliqi.
Lidhjen që e kishte me dëshmorin, e motra thotë se ishte e veçantë.
“I kom pas tepër raporte e mira me të se nuk na ka nda as gjumi. Ishin momente kur ai shkonte në ushtri askush nuk e ka kuptuar veç unë. Ishin moment shumë të mira si motër e vëlla më”, thotë ajo
Në këtë përvjetor u bë edhe zbulimi i pllakës përkujtimore për dy dëshmorët dhe nëntë martirët e Polluzhës të Drenasit.
I lumtur për zbulimin e kësaj pllake përkujtimore u shpreh kryetari i komunës, Ramiz Lladrovci.
“Unë sot jam i lumtur që po e zbulojmë këtë pllakë përkujtimore që e kanë ndërtuar familjarët, pra është me iniciativë të familjarëve. Sigurisht ne si institucione është dashur me i bo krejt këto vet”, u shpreh Lladrovci.
Për të nderuar dëshmorët e martirët e kësaj lagjeje erdhën edhe shumë figura të tjera politike.
