Qytetarë dhe krerë të institucioneve komunale kanë mbushur varrezat në Radishevë të Skenderajt.
Ata u mblodhën për të nderuar dhe për ta zbuluar pllakën përkujtimore për Shotë Galicën, Mehmet Delinë dhe Imer Fazlinë.
Në nderim të tyre, ceremonia nisi me një minutë heshtje.
Të pranishëm ishin edhe familjarët e tre heronjve, ndërsa fjalën e mori Bajram Morina, nipi i Shotë Galicës, në prag të 99-vjetorit të vdekjes së saj.
“Për mua është kënaqësi dhe krenari e veçantë që të jem këtu para gjithë këtyre njerëzve, e pas shumë e shumë luftërash, përpjekjesh e sakrificash, ka ardhur kjo ditë që ne të jemi të bashkuar”, deklaroi Morina.
Më pas, fjalën e mori nënkryetari i Komunës së Skenderajt, Fadil Nura, i cili tha se sot po nderohen dy epoka të heronjve.
“Këtu po nderojmë dy epoka të historisë sonë kombëtare, të cilat janë të lidhura ngushtë dhe janë në kontinuitet me historinë, sakrificën dhe mundin e luftës sonë për liri, nga periudha e lëvizjes çlirimtare të udhëhequr nga Qerime Shotë Galica, deri në luftën e UÇK-së”, theksoi Nura.
Një kërkesë për institucionet e pati edhe kryetari i fshatit, Naim Ahmetaj.
“Nga ky vend i shenjtë shpreh edhe një dëshirë dhe një apel ndaj institucioneve komunale dhe qeveritare të Kosovës, që në vitin e ardhshëm, në rastin e 100-vjetorit të ndarjes nga jeta të Shotë Galicës, në Skenderaj dhe Prishtinë të ngrihet një memorial dinjitoz për Shotë Galicën”, theksoi Ahmetaj.
Në fund të ceremonisë u bë edhe zbulimi i pllakës me fotografitë e tre heronjve.
Familjarët, të emocionuar, u afruan pranë duke prekur fotografitë e tyre, ndërsa disa të tjerë shfrytëzuan rastin për të bërë fotografi.
Nipi i themeluesit të fakultetit të mjekësisë në Universitetin e Prishtinës, Sami Haxhibeqiri, ka vazhduar rrugëtimin familjar në mjekësi, të nisur tashmë prej tre brezash. Babai i Samiut, doktor Shpend Haxhibeqiri, ka rrëfyer për Tëvë1 emocionet pasi pranoi lajmin që djali iu pranua në fakultetin të cilin babai i tij e themeloi tri dekada më parë.
