Kryetari i Komunës së Drenasit, Ramiz Lladrovci ka thënë se në këtë komunë situata në orët e mbrëmjes ka filluar të përkeqësohet nga reshjet.
Ai ka thënë se ardhjet e ujit nga rrjedhat e Vërbocit kanë filluar të vijnë më të madhe dhe se mund të ketë ndërprerje të energjisë elektrike përsëri.
“Për momentin gjendja është nën kontroll por kanë filluar ardhjet e mëdha të ujit nga rrjedhat e Vërbocit dhe prapë ka filluar me na rrezikuar trafo stacionin e Drenasit dhe kem frikë se duhet ta ndalojmë prapë energjinë elektrike. Pas një ore mund të kemi ndalje të rrymës prapë”, ka thënë Lladrovci në emisionin “InfoNata” në Tëvë1.
Ai ka thënë se dëmet në këtë komunë si pasojë e vërshimeve janë të mëdha në infrastrukturë, biznese e ekonomi familjare.
Lladrovci ka njoftuar se ura në fshatin Shtrubullovë është dëmtuar duke u bërë thirrje qytetarëve që të kenë kujdes.
Komuna e Drenasit ka qenë ndër më të prekurat nga vërshimet si pasojë e reshjeve të shiut që kanë filluar nga mbrëmë.
Disa familje në këtë komunë janë evakuuar, ndërsa që gjatë ditës mbi 4 orë nuk kishte energji elektrike.
