Deri para dy ditëve gjendja e bllokut A3 dhe B1 ishte stabile. Madje njësia A3 prodhonte rreth 130 megavat të energjisë në orë, kurse B1 260 megavat në orë.
Kështu bëhej e ditur në të dhënat e dërguar nga Korporata Energjetike e Kosovës për Tëvë 1.
“Njësia gjeneruese A3, – është duke operuar me fuqi prej rreth 130 MW/h, gjendja e kësaj njësie paraqitet e qetë dhe stabile, referuar Bilancit Vjetor Energjisë Elektrike (BVEE) në fuqi kjo njësi parashihet që ta realizoj remontin e rregullt vjetor gjatë majit Tetor, remonti mesatarisht zgjatë 20 ditë. Njësia gjeneruese B1 – Kjo njësi gjeneruese është në operim me fuqi prej rreth 260 MË/h dhe gjendja aktuale e kësaj njësie paraqitet e qetë dhe stabile, bazuar në planin e aprovuar, kjo njësi tanimë e ka përfunduar remontin e rregullt vjetor në muajin Korrik, 2022”, tha Skënder Bucolli – zëdhënësi i KEK-ut.
Por të dielën pikërisht njësia A3 kishte dalë jashtë funksionimit dhe nuk prodhonte më rrymë.
Kurse të hënën për një kohë të shkurtë u ndërpre edhe prodhimi i rrymës në njësinë B1.
Por nuk vonoi shumë dhe ky bllok u kthye në funksionim megjithatë jo me kapacitete e mëhershme.
“Korporata Energjetike e Kosovës njofton opinionin se për shkaqe teknike njësia B-1 për një kohë të shkurt ka ndërprerë prodhimin dhe e njëjta tashmë është kthyer në operim. Në këto çaste kjo njësi është duke prodhuar mbi 210 MW/h dhe pas pak do të arrij kapacitetin optimal prej rreth 260 MW/h”, thuhet në njoftimin e KEK-ut.
E prishja e këtyre njësive sipas nënkryetarit të sindikatës së re të KEK-ut, Nexhat Llumnica po ndodh për shkak të vjetërsisë së blloqeve.
Madje dalja jashtë funksioni e njësisë A5 e cila kishte ndodhur më parë, sipas Llumnicës i ka kushtuar dëm miliona euro Kosovës.
Pas prishjes së njësisë A3 nga KESCO kanë bërë thirrje që të kursehet maksimalisht energjia elektrike, derisa kufizimet e energjisë elektrike vazhdojnë të jenë 2 orë.
Kronika e gazetares Doresa Geci.
