Takimi në mes të kryengociatorëve të Kosovës dhe Serbisë me ndërmjetësim të emisarit sllovak, Miroslav Lajcak, ka përfunduar.
Kreu i ekipit negociator të Serbisë, Petar Petkoviq, pas përfundimit të takimit, ka folur për marrëveshjen që është arritur lidhur me zbatimin e deklaratës për të pagjeturit.
Sipas tij, është hequr pengasa e fundit.
“Tani është hequr edhe pengesa e fundit kur flasim për zbatimin e Deklaratës për Personat e Pagjetur. Ne kemi Deklaratën, Rregulloren dhe do të formojmë një komision. U ra dakord për një komision të përbashkët që do të ofrojë mbështetje për Grupin e Punës, i cili do të kryesohet nga Komiteti Ndërkombëtar i Kryqit të Kuq, si më parë. Kjo është veçanërisht e rëndësishme për ne”, ka thënë Petkoviq, shkruan KO.
Ai tha se nuk do të kishte përpjekje nga ana e tyre, marrëveshja nuk do të ishte arritur.
“Nëse nuk do të kishte përpjekje nga ana jonë, marrëveshja nuk do të ishte arritur. Beogradi ka insistuar për këtë gjatë gjithë kohës dhe ne gjithmonë kemi theksuar se çështja e të pagjeturve nuk është çështje politike, por thjesht humanitare”, ka deklaruar Petkoviq.
Bislimi tha se Kosova dhe Serbia do ta kenë një komision të përbashkët, i cili do të fillojë të merret me këto çështje që nga janari.
“Tani mund të ecim tutje që gjatë muajit të ardhshëm të mbahet mbledhja e parë e komisionit të përbashkët. Ka premtime nga ana e Serbisë që nuk do të ketë tendenca që në të ardhmen puna e këtij komisioni të pengohet”, tha Bislimi.
