Ka përfunduar seanca fillestare ndaj Faton Klinakut dhe Nuredin Selmanit, të cilët po akuzohen për kanosje ndaj kryeministrit në detyrë të Kosovës, Albin Kurti.
Në seancën dëgjimore, Klinaku e Selmani kanë mohuar fajësinë për kanosje ndaj kryeministrit Kurti.
Ndërkohë gjykatësi, Rrahman Beqiri ka deklaruar se Kurti ka të drejtë të ushtrojë kërkesë pasurore juridike, mirëpo kryeministri në detyrë ka deklaruar se nuk do ta paraqet një kërkesë të tillë.
Ndryshe, Klinaku, së bashku me një person tjetër me inicialet N.S., akuzohen nga Prokuroria Themelore e Prishtinës për kanosje ndaj Kurtit përmes rrjeteve sociale më 30 gusht të vitit 2023.
Klinaku kishte deklaruar në fillim të gushtit se as ai dhe as avokati i tij nuk ishin njoftuar për ngritjen e aktakuzës ndaj tij, por kishte shtuar se “mezi pret” të ballafaqohet me Kurtin në gjykatë.
Prokuroria Themelore në Prishtinë ka dorëzuar aktakuzën ndaj dy personave të cilët dyshohen se kanë kanosur kryeministrin në detyrë të Kosovës, Albin Kurti.
Sipas aktakuzës, më 30 gusht 2023, Klinaku akuzohet se ka ripostuar një mesazh me përmbajtje kërcënuese ndaj Kurtit, ku thuhej:
“… Prapë po e përsëris, nëse ju duket skandaloz postimi i mëhershëm: Më parë e vras A.K. sesa t’ia lëshoj rrugën dhe të iki nga Kosova.”/teve1.info/
