Ka përfunduar procesi i rinumërimit të të gjitha votave të zgjedhjeve të 28 dhjetorit, i cili kishte nisur më 13 janar, pas dyshimeve për manipulime në votat e kandidatëve për deputetë.
Sipas të dhënave të publikuara në platformën zyrtare të Komisionit Qendror të Zgjedhjeve (KQZ), janë rinumëruar të gjitha 2,557 vendvotimet në nivel vendi.
KQZ-ja ka paralajmëruar mbajtjen e një mbledhjeje për nesër (e shtunë), ku pritet të shpallen rezultatet përfundimtare të zgjedhjeve.
Nga rinumërimi nuk ka pasur ndryshime në ndarjen e mandateve të deputetëve për partitë politike, por janë evidentuar lëvizje të konsiderueshme në numrin e votave të kandidatëve individualë.
Ndryshimet më të mëdha janë regjistruar në listën e Partisë Demokratike të Kosovës (PDK), ku nëntë kandidatë kanë rezultuar me mbi 1 mijë vota më pak pas rinumërimit. Kandidati më i prekur është Fetah Paçarizi, i cili ka humbur 6,869 vota. Pas tij vijnë Nait Hasani me 3,326 vota më pak, Kujtim Gashi me 2,434, Luljeta Veselaj-Gutaj me 2,118, Arianit Çollaku me 1,673, Fadil Demaku me 1,308, Enver Hoxhaj me 1,237, Xhavit Haliti me 1,167 dhe Gazmend Maliqaj me 1,034 vota më pak.
Edhe në Lidhjen Demokratike të Kosovës (LDK) janë evidentuar dy kandidatë me mbi 1 mijë vota të humbura pas rinumërimit. Bëhet fjalë për kandidatët nga Prizreni, Xhavit Uka dhe Driton Selmanaj. Ukës i janë hequr 1,628 vota, ndërsa Selmanajt 1,065.
Ndërkohë, në Lëvizjen Vetëvendosje (LVV), më së shumti vota ka humbur Taulant Kelmendi me 922, i ndjekur nga Arbër Rexhaj me 622 vota më pak.
