Ka përfunduar me sukses edicioni i katërt i festivalit ndërkombëtar “Peja Rock Climbing Festival”, i organizuar nga “Marimangat e Pejës”, i cili për dhjetë ditë me radhë e shndërroi Pejën dhe Grykën e Rugovës në një nga pikat kryesore të ngjitjes sportive dhe aventurës.
Festivali u zhvillua nga 4 deri më 13 shtator, ndërsa në të morën pjesë 20 ekspertë të ngjitjes sportive nga tetë shtete të ndryshme të botës.
Gjatë festivalit, pjesëmarrësit punuan në një projekt të gjerë për zhvillimin e infrastrukturës së ngjitjes, me synimin për ta promovuar Pejën dhe Grykën e Rugovës si destinacion ndërkombëtar për këtë sport.
Ekspertët u angazhuan në hapjen e vijave të reja të ngjitjes, ndërsa në vijat ekzistuese u kryen vlerësime, përmirësime dhe zëvendësime të pajisjeve, në përputhje me standardet ndërkombëtare të sigurisë.
Për secilën prej vijave të ngjitjes janë përgatitur hartat përkatëse, ndërsa janë përcaktuar edhe shkalla e vështirësisë dhe gjatësia e tyre.
