Përmes një postimi në Facebook, Tabaku ka thënë se Bogujevci, nuk do ta kishte menduar kurrë se do të fliste në emër të Kosovës për herë të parë në Këshillin e Evropës dy dekada më parë, shkruan teve1.info
“Saranda Bogujevci, nuk do ta kishte menduar kurrë se do të fliste në emër të Kosovës për herë të parë në Këshillin e Europës dy dekada më parë. Nuk do ta kishte besuar asnjëherë se 20 vite pas tmerrit të masakrës në Kosovë nga forcat e nacionalizmit shovinist, të cilës tetë anëtarë të familjes së saj (përfshirë të ëmën dhe dy vëllezërit) nuk do t’I mbijetonin, ajo do të fliste për vuajtjen që i kujtonte lufta sot në Ukrainë”, ka shkruar Tabaku.
Tutje Tabaku theksoi se historia e deputetes, Saranda Bogujevci duhet të jetë sinjal për BE-në.
“Historia e Sarandës duhet të jetë një sinjal për Bashkimin e Europian që të mos harrojë angazhimin për të vazhduar zgjerimin dhe mbi të gjitha për të mbështetur zhvillimin e një shteti të ri me histori të trishtë. Kosova nuk ka pse mbetet e izoluar si një ishull”, ka shkruar ajo.
Tabuku përmendi edhe liberalizimin e vizave, duke thënë se tashmë nuk ka asnjë arsye për të mos u aplikuar siç është aplikuar edhe për vendet tjera.
“Liberalizimi i vizave nuk ka më asnjë arsye për të mos u aplikuar mbi Kosovën njësoj siç është aplikuar mbi vendet e tjera të Ballkanit Perëndimor. Fryma dhe besimi i qytetarëve të Kosovës është tërësisht pro vlerave të BE-së dhe nuk ka asnjë arsye objektive për të ndaluar procesin e integrimit euro-atlantik”, ka shkruar Tabuku.
