Mirëpo, të premten kryeministri, Albin Kurti, tha se për këtë rast, janë shkarkuar edhe dy zyrtarë të lartë të Policisë së Kosovës.
Drejtori i Policisë Rajonale në Prishtinë dhe Drejtori i Operativës brenda Policisë, tashmë nuk janë më nëpër këto pozicione.
E përkundër kësaj, shefi i qeverisë nuk është i kënaqur.
Kërkon marrjen e masave ndaj prokurorëve dhe gjyqtarëve, për shkak që si thotë ai, mospunës së tyre.
Madje, ua shtron edhe një pyetje: ku është morali i prokurorëve dhe gjyqtarëve?
“Aktakuza jo të fuqishme të prokurorëve mundësojnë që dhunuesit shpesh të mos ndëshkohen. Gjykatat nuk i gjykojnë rastet e dhunimeve në përputhje me ligjet në fuqi, që parashohin dënime prej më së paku 10 vitesh për dhunë seksuale ndaj personit nën moshën 14 vjeç”, ka thënë Kurti.
Këtyre akuzave përmes një reagimi të përbashkët i kundërshtoi Këshilli Gjyqësor i Kosovës dhe ai Prokurorial.
Këta dy mekanizma të drejtësisë kanë thënë se sillen si institucione të përgjegjshme të pavarura dhe profesionale dhe jo si disa institucione të tjera të cilat nuk përngjajnë më institucione shtetërore.
“Këshilli Gjyqësor dhe Këshilli Prokurorial i bëjnë thirrje Qeverisë që të përmbush përgjegjësitë kushtetuese dhe ligjore për krijimin e kushteve të nevojshme për strehimin dhe rehabilitimin e viktimave të krimit, në mënyrë që viktimat e krimit të mos të mbesin në mëshirën e organizatave jo qeveritare për strehim dhe rehabilitim”, thuhet nw reagim.
Rasti i dhunimit seksual i 11-vjeçares në njërin nga parqet e kryeqytetit, nga pesë persona të dyshuar, ngjalli reagime të mëdha.
Madje, të mërkurën mijëra qytetarë protestuan në Prishtinë, duke fajësuar institucionet për neglizhencë ndaj këtyre rasteve dhe dështim të mbrojtjes së grave.
Kronika e gazetarit Arton Rama.
