Orarin e thirrjes së seancës konstituive të Kuvendit të Kosovës, e respektoi kryetari i AAK-së, Ramush Haradinaj.
Por njëjtë nuk vepruan edhe deputetë të tjerë.
Kësisoj, si në herët e kaluara, edhe kësaj radhe, seanca nuk filloi me kohë.
Pasi u mblodhën të gjithë, kryesuesi i seancës, Avni Dehari mori fjalën.
Edhe këtë të shtunë, ai propozoi votim të fshehtë, për çka kërkoi nga partitë e tjera të propozojnë emrat për anëtar të komisionit ad-hoc.
Nga Partia Demokratike e Kosovës, fjalën e mori kryetari i saj, Memli Krasniqi i cili ishte kundër një propozimi të tillë.
“I nderuar kryesues iu ftoj që përkundër presionit që e keni nga partia që i takoni mos u bëni pjesë e shkeljes ligjore. Mos e shkelni Kushtetutën, mos e bëni cirk këtë Kuvend”, tha Krasniqi.
I menjëhershëm ishte reagimi i Deharit, i cili kërkoi që Krasniqit t’i ndalet fjala.
Në foltore nuk dolën përfaqësuesit e partive tjera, LDK-së, AAK-së e Nismës, por ai i Listës Serbe, Igor Simiç të cilit i reaguan deputetët e LVV-së.
Kësisoj, pa unifikim, dështoi edhe këtë herë konstituimi i Kuvendit, tentimi i dhjetë.
Seanca e radhës u thirr për të hënën më 5 maj në ora 10:00.
