Shkruan: Artan Fuga
Përse opozita në vend të një beteje me karriget e sallës së komisionit të reformës zgjedhore, nuk ndërton një politikë racionale?
Kuptohet që grupi i partisë demokratike që drejtohet nga dr. Sali Berisha ka njëmijë herë të drejtën për të pasur anëtarët e vetë në komisionin për reformën zgjedhore.
Kjo nuk ka asnjë diskutim. Mjerë ata deputetë që mendojnë se duke u hequr të drejtat reale kolegëve të tyre janë në pozita të drejta si përfaqësues të popullit.
Mbi deputetët dhe votimin e tyre qëndron Kushtetuta, mbi Kushtetutën qëndron e drejta e Zotit dhe mbi të drejtën e Zotit qëndron logjika e kulluar e njeriut.
Shihet se opinioni politik i një deputeti nuk është veçse një rang i ulët shumë përpara vlerave sipërore. Mjerë ai që i shkel ato!
Mirëpo, pasi janë thënë këto pyetja që bëhet logjikisht është kjo: Kjo opozita e partisë demokratike me logon e rithemelimit përse e kërkon vendin e bashkëkryetarit në komisionin e reformës zgjedhore?
Përgjigja më e thjeshtë e çdo mendjeje jo konfuze do të ishte se e do për të propozuar opsionet e veta për një kod zgjedhor të drejtë, të ligjshëm që të shprehet lirshëm vullneti i popullit.
Po atëherë, a ka propozime? Nëse ka, përse nuk i bën? Nëse nuk ka por do vetëm të ndajë tortën e komisionit me socialistët, atëherë kujt i intereson kjo betejë karrigesh veç ndonjërit që do të jetë në komision për veten e tij?
Opozita ka një pistë të gjerë për të vepruar që nuk po e shfrytëzon. I duket se po bën më të mirën, por bazuar te një logjikë e ftohtë qytetari kërkon tjetër gjë prej saj.
Ka shumë parti opozitare në Kuvend. Ka parti opozitare edhe jashtë Kuvendit. Pastaj ka shoqëri civile që në segmente të saj ka jo vetëm ekspertizë të lartë juridike, shumë më të lartë se ajo e deputetëve, por edhe e gatshme për të kontribuar. Ka edhe intelektualë, specialistë në fushën e së drejtës.
Përse opozita nuk nis një forum paralele për të propozuar një kod të ri elektoral që të jetë alternativ? Të mblidhen në Kuvend me pjesëmarrje të gjerë dhe të përpunojnë kodin e duhur elektoral.
Pastaj të dalin me një ose disa alternative dhe t’i bëjnë të njohura, t’i paraqesin në Kuvend, dhe sidomos t’i votojnë në një elektorat të gjerë.
Ne duam bashkëkryetarin? – bërtasin disa. Mirë, vazhdojeni kërkojeni, por përse nuk avanconi edhe në këtë pistën tjetër, të një politike racionale?
Përse kjo betejë me mullinjtë e karrigeve?
Përse duhet kjo alternativë e politikës pragmatiste dhe racionale që duhet të përfshijë që nga kryetari deri te anëtari më i thjeshtë?
Sepse kështu opinioni publik bindet se vërtet opozita është opozitë dhe nuk është betejë karrigesh, me karrige, për karrige. Qytetari pyet : More çfarë na propozojnë këta?
Qytetari ka nevojë të sqarohet : Kjo opozitë bërtitëse ka ide apo jo? A ndjek ajo procedura të tjera demokratike për të bërë një kod të ri elektoral, apo do si gjithmonë të marrë pjesë në të turpshmim KOMISION BIPARTIZAN, mohimin më të fëlliqur të shtetit ligjor.?
Nuk sheh, na ka kënaqur opozita në këtë shtetin jo monopartiak por dypartiak!!!
Dhe jo më kot ka opozitarë me peshë që nuk kërkojnë vendosjen e shtetit ligjor, por të pluralizmit!!! Hajde mendje hajde! A thua se shteti ligjor dhe pluralizmi janë e njëjta gjë. Pra, kupto që po qe se në komision jemi edhe ne, atëherë po, gjithçka në rregull!!!
Me këtë përrallë kujton opozita se do ta bindë elektoratin?
Me këtë luftë karrigesh do ta mundë Ramën?
Në vend të përgatisë draft alternativ, me procedura demokratike, me pjesëmarrje të gjërë qytetare, dhe ta kërkojë të hidhet në referendum.
Qytetari ka nevojë për qendresë opozitare, por edhe për politikë opozitare racionale, të bërtiturat, hakërrimet fizike, shkuljet e mikrofonave, sharjet korridoreve të Kuvendit, po ua them sinqerisht, nuk i ha më askush.
Nëse aksioni i opozitës mbetet aty besueshmëria e saj në sytë e “luanit të fjetur” shkon drejt temperaturave nën zero.
Disa deputetë do ta rimarrin kolltukun e tyre të deputetit, mbase në 2025, por elektorati demokrat do të marrë të famshmin dhe të madhin “Noc Rrok”!
Prandaj ka nevojë për mobilizim të degëve për një politikë racionale të opozitës që i intereson Shqipërisë dhe kombit, qytetarit!
Përndryshe unë nuk shoh se çfarë rezultatesh më shumë ka sjellë opozita anti-Basha, nga politika e z. Lulzim Basha!
Opozita është një rrugë të gabuar së paku për këtë problem. Dhe këtë e paguan Shqipëria!
Ky shkrim është marrë nga profili i autorit në Facebook.
Opinioni përmban pikëpamjet e autorit dhe nuk prezanton qëndrimet editoriale të teve1.info
