Sërish perimetri i sigurisë u vendos në oborrin e rektoratit të Universitetit të Prishtinës.
Edhe kësaj here njoftimi erdhi përmes postës elektronike e me të njëjtin dyshim se një mjet shpërthyes gjendet brenda objektit.
Bashkë me qentë zyrtarët policor u nisen për të kërkuar një bombë të paralajmëruar.
E përveç tyre, Policia e Kosovës përdori edhe pajisje tjera për të identifikuar këtë mjet shpërthyes.
Por edhe kësaj here ky alarm ishte i rrejshëm.
Gjatë inspektimit nga njësiti antibombë, nuk doli asnjë mjet shpërthyes brenda dhe jashtë objektit.
“Pas ndërmarrjes së të gjitha veprimeve të nevojshme operative si dhe kontrollit të detajuar të hapësirës së caktuar nga ana e njësive të specializuara për menaxhimin me mjetet shpërthyese, informata – alarmi ka rezultuar të jetë i rrejshëm”, thuhet në njoftimin e Policisë.
Sipas tyre, këto alarme po vijnë përmes postës elektronike, mirëpo deri në këtë periudhë nuk është identifikuar personi që po i dërgon të njëjtat.
Përveç Rektoratit, gjatë javës së kaluar alarm të njëjtë për bombë ka pasur edhe në Gjimnazin “Xhevdet Doda” në kryeqytet.
Këto alarme si shqetësuese i sheh njohësi i çështjeve të sigurisë, Drizan Shala.
Në anën tjetër, përpos Kosovës me këtë alarme është përballur edhe Mali i Zi, Maqedonia dhe Serbia.
Raporti i gazetares Fetije Kamberi.
