PËR DITËN E AMERIKËS

Shkruan: Arben Fetoshi

Shtetet e Bashkuara nuk prishen me Kosovën. Një projekt i tyre gjeostrategjik s’mund të jetë në rend dite për sanksione a ndërprerje të marrëdhënieve.

Mirëpo, pragmatizmi i tyre na mëson se gjithmonë duhet të kemi “frikë”. Duke pasur frikë, gjithmonë i shërbejmë më mirë interesave të vendit. Kosova këto ditë është me një “grip”, të cilin dëshiron ta kalojë pa marrë “terapinë” e rekomanduar. Madje po e refuzon duke e vlerësuar të gabuar, ani pse ia kanë rekomanduar “mjekët” më të mirë në botë.

Pra, me gjuhën e mjekësisë, një pacient që potencialisht e rrezikon shëndetin me kryeneçësinë e tij prej të marri.

Si mund të kalohet “gripi” pa pasoja për rendin juridik e integritetin territorial nëse e refuzojmë “terapinë” amerikane?

Garancitë e saj lidhur me asociacionin në bazë të kushtetutës, e kanë referencë përforcuese dështimin në Bosnjë-Hercegovinë. Prandaj do ta kundërshtojnë një zgjidhje që nuk është zgjidhje. Do ta kundërshtojnë një “republikë serbe” të dytë, mirëpo as nuk do ta lejojnë që serbët në Leposaviq të qeverisen nga një shqiptar me një grusht vota. Demokracia nuk e lejon një deformim të tillë, ndërsa koha e imponimeve ka ikur bashkë me Jugosllavinë dhe komunizmin.

Në këtë 247 vjetor të SHBA, raportet jo “fort” të mira aktualisht i pohojnë edhe zyrtarët më të lartë të Kosovës.

“Trajneri” i Kosovës në ndeshjen me Serbinë është bërë nervoz me “lojën” e ekipit dhe egocentrizmin e kapitenit, kryeministrit Kurti. Nëse përdorim një krahasim me futbollin, SHBA-të janë trajneri ynë, jo referi. Trajneri ka përgatitur një strategji për ndeshjen, por të cilën kapiteni nuk po e zbaton. Kryeneçësia e kapitenit e ka nervozuar trajnerin dhe ai vazhdon ta “qortojë” që t’i kthehet strategjisë. I ka mbështetur vendimet e referit (masat e BE-së), mirëpo s’heq dot dorë nga finalja.

SHBA-të, ashtu si deri më tani, janë kujdesur që ta fitojmë edhe finalen.

Imponimi i Kosovës së pavarur në Beograd do të jetë fitore jona historike, por kjo fitore kërkon doemos bashkërendim, koordinim dhe maturi, nga pushteti e opozita bashkë.

Kalkulimet elektorale në kohë sfidash jetike për shtetin, janë saktësisht e kundërta e asaj që përfaqëson 4 Korriku.