Është në mesin e dëshmitarëve të Prokurorisë Speciale.
Velko Iliq, erdhi të enjten për të dëshmuar në rastin “Banjska”.
Mirëpo, para trupit gjykues, ai u ankua për gjendjen e tij shëndetësore.
“Situata është e tillë, i kam dhënë dokumente prokurorisë dhe jam me barna që shumë vite dhe është shumë stresuese të qëndroj deri në fund”, tha dëshmitari Velko Iliq.
Pa nisur ende dëshmia, Prokuroria Speciale propozoi mbylljen e seancës, me arsyetimin së dëshmia e Iliç ka përmbajtje të ndjeshme.
“Dëshmia e këtij dëshmitari është e ndjeshme në të cilën përfshihen informata të çështjes së sigurisë kombëtare, strukturave paralele të organizuara me veprimtarinë e tyre ilegale në veri të vendit”, tha Prokurori Special, Naim Abazi.
Prokurori special, dha disa detaje për natyrën e informacioneve që dëshmitari do t’i shpalosë para Gjykatës.
“Meqenëse dëshmia e këtij dëshmitari lidhet kryesisht me rekrutimin, organizimin, pagesat dhe kontaktet e strukturave të dyshuara ilegale, përfshirë edhe elemente që mund të dërgojnë në identifikimin e personave të tjerë të përfshirë në këtë veprimtari kriminale. Për më tepër, ekziston edhe rrezik real personale të dëshmitarit dhe familjes së tij”, u shpreh ai.
Arsyetimi i prokurorit për propozimin për mbyllje të seancës, nuk ishte i mjaftueshëm për mbrojtjen.
“Ky sqarimi i prokurorisë nuk më ka bindur se me prezencën e publikut e medias rrezikohet dëshmitari”, tha Ljubomir Pantoviq – avokat
Përkundër kundërshtive, trupi gjykues aprovoi propozimin e prokurorisë, duke përjashtuar nga seanca mediat dhe publikun.
Ky është dëshmitari i dytë në rastin “Banjska” që dëshmon në seancë të mbyllur.
