Murat Dernjani është shpallur fajtor për krime kundër njerëzimit.
Ai u dënua me dy dekada burgim, për krime të kryera ndaj popullatës civile gjatë luftës Siri –Irak përgjatë periudhave mars 2014 – tetor 2017.
“Të pandehurit Murat Dernjani, i shqipton dënim me burgim me kohëzgjatje prej 20 vitesh. Vendimi i cili do të ekzekutohet kur aktgjykimi të bëhet i formës së prerë”, ka thënë kryetarja e trupit gjykues, Violeta Namani-Hajra.
Në procesin gjyqësor i cili për shkak të ndjeshmërisë së rastit është zhvilluar me dyer të mbyllura, kanë qenë 33 viktima.
“I pandehuri Murat Dernjani, i cili duke i blerë e duke i shitur viktimat tek personat e tjerë, ku të dëmtuarat kanë deklaruar se kanë qenë skllave të tij, i ka rrahur në mënyrë më të vrazhdë dhe poshtëruese, janë përdhunuar nga i pandehuri. Ku gjatë kryerjes së kësaj vepre penale, i pandehuri ishte i armatosur dhe me uniformë të organizatës ISIS”, tha Hajra.
Në leximin e arsyetimit të vendimit të Gjykatës, u tha se është vërtetuar se në mesin e viktimave të krimeve të kryera nga Murat Dernjani, kishte edhe fëmijë.
“Ka aplikuar masat e torturimit dhe të shkaktimit të vuajtjeve të mëdha, apo cënimin e integritetit trupor ose shëndetit kundër popullsisë civile, në atë mënyrë që në bazë të dëshmive të të dëmtuarave të dëgjuara në cilësinë e dëshmitareve, në mënyrë të sigurt është vërtetuar se ka kryer dhunim seksual ndaj femrave të komunitetit jazide. Në mesin e këtyre viktimave ka pasur edhe të moshës së mitur”, tha ajo.
Për gjithë këto krime, në Gjykatë janë dëgjuar tri dëshmitare në formën online, kurse dëshmi të tjera për shkak të mossigurimit të prezencës, janë marrë të lexuara nga autoritetet e huaja.
“Tri të dëmtuarat me inicialet Sh.L, Z.K, A.H, janë dëgjuar në cilësinë e dëshmitarëve në këtë çështje penale. Këto dëshmi janë realizuar përmes video linkut, përmes rrugëve të bashkëpunimit juridik ndërkombëtar me shtetet përkatëse”, deklaroi kryetarja e trupit gjykues.
Dernjani është i lindur dhe i rritur në Gjermani, prej nga dyshohet se ka udhëtuar për në Siri.
Ndjekja e këtyre krimeve, Prokuroria Speciale tha se është mundësuar falë bashkëpunimit ndërkombëtar.
“Një bashkëpunim të madh të cilin e kemi pasur me të gjitha shtetet e Evropës, e veçanërisht Gjermania e cila ka dhënë një kontribut për zbulimin e këtij rasti, por edhe vendet tjera si Londra, hetuesit e FBI-së, pastaj Franca e Iraku”, tha prokurorija special, Florije Saliu-Shamolli.
Në shpalljen e vendimit, nuk ishte i pranishëm i pandehuri.
