Pentagoni e ka bllokuar në heshtje Ukrainën nga përdorimi i një sistemi raketash me rreze të gjatë veprimi të prodhuar në SHBA kundër Rusisë, me miratimin përfundimtar që i takon Sekretarit të Mbrojtjes Pete Hegseth,ka raportuar të shtunën The Wall Street Journal.
Ky veprim po kufizon aftësinë e Kievit për të përdorur raketat në mbrojtje.
Ky zhvillim vjen në një kohë kur Presidenti i SHBA-së, Donald Trump, është bërë gjithnjë e më i zëshëm në lidhje me zhgënjimin e tij me luftën trevjeçare.
Sipas zyrtarëve, një proces miratimi i nivelit të lartë brenda Departamentit të Mbrojtjes, i cili nuk është bërë i ditur, e ka bllokuar Ukrainën nga lëshimi i çdo rakete ATACMS me rreze të gjatë veprimi të furnizuar nga SHBA-të kundër objektivave ruse që nga fundi i pranverës.
Në të paktën një rast, Kievi kërkoi të përdorte raketat kundër territorit rus, por iu refuzua, konfirmuan dy zyrtarë, raportoi Journal.
Pas një samiti me Presidentin rus Vladimir Putin dhe takimeve të mëvonshme me udhëheqësit evropianë dhe Presidentin ukrainas Volodymyr Zelensky, Trump tha të premten se po shqyrton përsëri mundësinë e vendosjes së sanksioneve ekonomike ndaj Moskës ose tërheqjes potenciale nga procesi i paqes.
Trump është përpjekur të organizojë një takim kokë më kokë midis Putinit dhe Zelenskit, por përpjekjet kanë ngecur.
Ministri i Jashtëm rus, Sergej Lavrov i tha NBC të premten se nuk ishte përgatitur asnjë axhendë për një takim.
Gazeta raportoi se shefi i politikave të Pentagonit, Elbridge Colby, krijoi një “mekanizëm shqyrtimi” për të vlerësuar kërkesat e Ukrainës për të përdorur armë me rreze të gjatë veprimi të prodhuara në SHBA, si dhe sisteme evropiane të varura nga inteligjenca ose pjesët e saj amerikane, duke shtuar se miratimi përfundimtar i takon Hegseth.
Trump shkroi të enjten në mediat sociale se Ukraina nuk mund ta mposhtte Rusinë pa qenë në gjendje të “luante në sulm”, duke theksuar: “Është shumë e vështirë, nëse jo e pamundur, të fitosh një luftë pa sulmuar… Nuk ka shanse për të fituar!”/Anadolu
