Pentagoni njoftoi të hënën se kompanisë Boeing iu dha një kontratë në vlerë 8.6 miliardë dollarë për Programin e Avionëve F-15 për Izraelin.
“Kjo kontratë parashikon projektimin, integrimin, instrumentimin, testimin, prodhimin dhe dorëzimin e 25 avionëve të rinj F-15IA për Forcën Ajrore Izraelite me një opsion për 25 avionë shtesë F-15IA”, thuhet në një deklaratë.
Sipas Pentagonit, puna në kuadër të këtij programi do të zhvillohet në shtetin amerikan të Misurit dhe pritet të përfundojë deri më 31 dhjetor 2035.
Njoftimi u bë pas një takimi në Floridë midis Presidentit të SHBA-së Donald Trump dhe Kryeministrit izraelit Benjamin Netanyahu, i cili po ashtu zhvilloi bisedime me dyer të mbyllura me Sekretarin e Mbrojtjes Pete Hegseth.
