Pentagoni tha të mërkurën se ka filluar dislokimin e 1,500 trupave që janë në detyrë aktive për të ndihmuar në sigurimin e kufirit jugor, duke vënë në zbatim planet e Presidentit Donald Trump për të goditur emigracionin të paraqitura në urdhrat ekzekutivë, menjëherë pasi mori detyrën.
Ushtruesi i detyrës së Sekretarit të Mbrojtjes, Robert Salesses tha se trupat do të fluturojnë me helikopterë për të ndihmuar agjentët e Patrullës Kufitare dhe për të ndihmuar në ndërtimin e barrierave. Pentagoni gjithashtu do të sigurojë avionë ushtarakë për fluturimet e Departamentit të Sigurisë Kombëtare që do realizojnë dëbimin e më shumë se 5,000 emigrantëve të ndaluar.
Numri i trupave dhe misioni i tyre mund të ndryshojë së shpejti, dhe se “Ky është vetëm fillimi,” tha ai.
“Me pak fjalë, departamenti do të zhvillojë dhe ekzekutojë misione shtesë në bashkëpunim me DHS, agjencitë federale dhe partnerët shtetërorë për të adresuar gamën e plotë të kërcënimeve që presidenti i paralajmëroj në kufijtë e vendit tonë,” tha Salesses.
Zyrtarët e mbrojtjes shtuan se departamenti është i përgatitur të sigurojë shumë më shumë trupa nëse kërkohet, duke përfshirë deri në 2,000 marinsa të tjerë, raporton AP.
Forcat e detyrës aktive do t’i bashkohen afërsisht 2,500 forcave të Gardës Kombëtare dhe Rezervës së SHBA-së që tashmë janë atje. Deri në këtë dislokim, nuk kishte trupa aktive në detyrë që punonin përgjatë kufirit rreth 2000 milje.
Trupat kanë bërë detyra të ngjashme në mbështetje të agjentëve të Patrullës Kufitare në të kaluarën, kur Trump dhe ish-Presidenti Joe Biden dërguan trupa në detyrë aktive në kufi.
Trupat janë të ndaluar me ligj që të kryejnë detyrat e zbatimit të ligjit sipas Aktit Posse Comitatus, por kjo mund të ndryshojë. Trump ka urdhëruar përmes urdhrit ekzekutiv që sekretari i ardhshëm i mbrojtjes dhe shefi i ardhshëm i sigurimit të vendit të raportojnë përsëri brenda 90 ditëve nëse mendojnë se një ligj i 1807 i quajtur Akti i Kryengritjes duhet të thirret. Kjo do të lejonte që ato trupa të përdoren në zbatimin e ligjit civil në tokën amerikane.
Hera e fundit që një akt i tillë u thirr në zbatim ishte në vitin 1992 gjatë trazirave në Los Anxhelos në shenjë proteste ndaj lirimit të katër oficerëve të policisë të akuzuar për rrahjen e Rodney King.
Personeli ushtarak është dërguar në kufi pothuajse vazhdimisht që nga vitet 1990 për të ndihmuar në adresimin e migracionit. trafiku i drogës dhe krimi transnacional.
Në urdhrat ekzekutivë të nënshkruar të hënën, Trump sugjeroi se ushtria do të ndihmonte Departamentin e Sigurisë Kombëtare me “hapësirën e ndalimit, transportin (përfshirë avionët) dhe shërbime të tjera logjistike”.
Ka rreth 20,000 agjentë të Patrullës Kufitare, dhe ndërsa kufiri jugor është vendi ku ndodhen shumica, ata janë gjithashtu përgjegjës për mbrojtjen e kufirit verior me Kanadanë. Zakonisht agjentët kanë për detyrë të kërkojnë kontrabandistë droge ose njerëz që përpiqen të hyjnë në vend të pazbuluar.
