Robert Gjeraj është përshëndetur nga futbolli aktiv në moshën 39-vjeçare. Nëpërmjet një postimi në facebook, Gjeraj ka njoftuar për vendimin e tij.
Ai këtë vendim e ka marrë pak muaj pasi ndihmoi Lirinë të rikthehet në Superligën e Kosovës.
Gjeraj ka thënë se ndihet krenar me karrierën e tij qe zgjati mbi dy dekada dhe ka falënderuar të gjitha klubet për të cilat ka luajtur, si dhe ata që e kanë përkrahur përgjatë këtij rrugëtimi.
Ai ka pranuar se vendimi nuk ishte aspak i lehtë, duke shtuar se kishte vështirë t’i gjente fjalët e duhura për shkak të emocioneve.
“Po largohem, pasi arrita qëllimin tim me ekipin e zemrës dhe vendlindjes, andaj kjo më bën të lumtur. Personalisht dhe me shumë sinqeritet dua t’i falënderojë të gjithë drejtuesit, bashkëlojtarët, trajnerët e tifozët që më ndihmuan shumë gjatë këtij rrugëtimi tim shumëvjeçar”, shkroi Gjeraj.
